Kartaǵa aqsha tússe, salyq tóleısiz be: mobıldi aýdarymdardy baqylaýdyń jańa tártibi engizildi
ASTANA. KAZINFORM — 8 qarashadan bastap Qazaqstanda mobıldi aýdarymdardy baqylaý talaptary ózgerdi. Endi azamattyń jeke shotyna úsh aı ishinde keminde 100 adamnan jalpy somasy 1,5 mıllıon teńgeden asatyn aýdarym tússe, bul týraly aqparat salyq organdaryna beriledi.
Jańa tártipti QR Qarjy mınıstrligi Memlekettik kirister komıtetiniń Jeke tulǵalardyń kiristerin ákimshilendirý basqarmasynyń sarapshysy Danagúl Saǵynbek túsindirdi.
Onyń aıtýynsha, ózgerister Qarjy mınıstriniń № 718 buıryǵynda qarastyrylǵan. Jańa talap kásipkerlik qyzmetke arnalmaǵan jeke bank shottaryna qatysty. Eger azamattyń shotyna qatarynan úsh aı boıy 100 nemese odan da kóp adamnan aqsha túsip, aýdarymdardyń jalpy somasy 360 aılyq eseptik kórsetkishten (AEK) assa, bank bul týraly salyq organdaryna málimet beredi.
— Buǵan deıin salyq organdarynyń baqylaýyna jalpy somasy 1 mıllıon 20 myń teńgeden asatyn mobıldi aýdarymdar ilinetin. Endi bul shek 1 mıllıon 557 myń teńgege deıin kóterildi, ıaǵnı jańa talap boıynsha aýdarymdardyń jalpy somasy osy mólsherden asýy tıis, — dep túsindirdi Danagúl Saǵynbek.
Mamannyń túsindirýinshe, atalǵan úsh talaptyń barlyǵy bir mezgilde oryndalýy tıis, ıaǵnı aýdarymdar qatarynan úsh aı ishinde keminde 100 túrli adamnan túsip, olardyń jalpy somasy belgilengen shekten asqan jaǵdaıda ǵana ekinshi deńgeıli bankter tıisti aqparatty memlekettik kirister organdaryna joldaıdy.
Salyq organdary bank usynǵan málimetterdi alǵannan keıin tekserý jumystaryn úsh kezeń boıynsha júrgizedi.
— Alǵashqy kezeńde azamatqa aqparattyq habarlama jiberiledi. Onda salyq organdarynyń nazaryn aýdarǵan jaǵdaılar týraly málimet beriledi. Mundaı habarlamaǵa jaýap berý mindetti emes. Ekinshi kezeńde kameraldyq baqylaý júrgiziledi. Eger azamat tapsyrǵan salyq eseptiliginen sáıkessizdikter anyqtalsa, oǵan tıisti habarlama joldanady. Bul jaǵdaıda azamat salyq eseptiligin tapsyrýy nemese anyqtalǵan sáıkessizdiktermen kelispese, túsinikteme berýi qajet. Úshinshi kezeń salyqtyq tekserýdi qamtıdy. Mundaı tekserý salyq organynyń tıisti sheshimi bolǵan jaǵdaıda ǵana taǵaıyndalady, — dedi spıker.
Danagúl Saǵynbektiń málimetinshe, birinshi jáne ekinshi toqsannyń qorytyndysy boıynsha azamattarǵa 274 318 push-habarlama jiberilgen. Sonyń nátıjesinde 55 133 adam jeke kásipker nemese ózin-ózi jumyspen qamtıtyn tulǵa retinde tirkelgen.
Sondaı-aq komıtet ókili habarlama alǵan azamattar tıisti kiristerin ózderiniń mártebesi men qoldanatyn salyq rejımine sáıkes salyq eseptiliginde kórsetýi qajet ekenin atap ótti.
Aıta keteıik, buǵan deıin salyq organdary mobıldi aýdarymdardy baqylaý kezinde azamattardyń jeke aýdarymdary men kásipkerlik qyzmetten túsken kiristerdi qalaı ajyratatynyn túsindirgen bolatyn.
