Karta oıynyndaǵy 2000 teńge qaryzy úshin adam óltirgen qylmysker quryqtaldy

Bul asa aýyr qylmys osydan eki aı buryn Seıfýllın dańǵylynyń boıyndaǵy úılerdiń biriniń mańynda oryn alǵan. Dál sol senbi kúni esh jerde jumys istemeıtin ekeý óz ýaqyttaryn ádettegideı daǵdyǵa aınalǵan - karta oıynymen ótkizip otyrǵan. Qumar oıynnyń qyzyǵyna ábden kirgen 43 jastaǵy Qasym óziniń seriktesine baıyrǵy karta oıynynan qalǵan qaryzdaryn esine salady.

"Kýágerlerdiń aıtýynsha, qatty shekisip qalǵan er adamdar, bir-birin jaman sózdermen de balaǵattaǵan. Sol kezde Q. esimdi azamat qoınynan pyshaq shyǵaryp, 48 jastaǵy azamat B.-nyń júrek tusynan salyp alǵan. Jábirlenýshi qylmys bolǵan jerde esin jımastan jan tásilim etken. Bastapqy tergeý men jedel is-shara kezinde ártúrli qurylys nysandarynda jumys istep, ýaqyttarynyń basym kópshiligin birge ótkizip júrgen eki tanystyń jeke bastary anyqtaldy. Sonyń nátıjesinde, qylmysker Shymkent qalasynyń mańyndaǵy qaraýsyz qalǵan saıajaı aýmaǵyndaǵy bir úıde boı tasalap jatqan jerinen ustaldy. Qazirgi ýaqytta ol Almatyǵa jetkizilip, qamaýǵa alyndy», - dedi Almaty qalasy ІІD-niń jeke basqa qatysty qylmystardy ashý bóliminiń bastyǵy, polıtsııa podpolkovnıgi Sabyrjan Jorabekov.

Onyń aıtýynsha, kisi qolynan qaza tapqan azamattyń karta oıynyndaǵy qaryzy nebári eki myń teńgeden sál ǵana asatyn somany quraǵan.