Qarsylasyn tek nokaýtqa túsiretin Arman Rysbek endi kimmen aıqasady

ASTANA. QazAqparat - Qazaqstandyq ekinshi orta salmaqtaǵy boksshy Arman Rysbek (5-0, 4 KO) kelesi jyldyń basynda óziniń kezekti aıqasyn ótkizedi, dep habarlaıdy Sports.kz.

BoxRec.com saıtynyń aqparaty boıynsha, boks keshi 18 qańtarda (Qazaqstanda 19 qańtar, tańerteń) San-Bernardıno qalasyndaǵy (AQSh, Kalıfornııa shtaty) Club Events Center-da ótedi. Jekpe-jek tórt raýndqa josparlanǵan, bizdiń otandasymyzdyń qarsylasy ázirge belgisiz. Bul Rysbektiń AQSh aýmaǵyndaǵy ekinshi aıqasy. Buǵan deıin ol eki ret óz otanynda jáne eki ret Argentınada bokstasqan.

Arman sońǵy ret rıngke 15 qyrkúıekte Aqtóbedegi boks keshi aıasynda shyqty. Onda ol úshinshi raýndta tehnıkalyq nokaýtpen Ózbekstan ókili Dmıtrıı Antıpovty (1-15) jeńgen edi.