Qarsylasyn nokaýtpen jeńgen Júkembaevtiń reıtıngi joǵarylady

NUR-SULTAN. QazAqparat - Qazaqstandyq boksshy Batyr Júkembaev (16-0, 13 KO) meksıkalyq Lýıs Hesýs Vıdalesti (13-7, 6 KO) jeńgennen keıin Boxrec.com beldi saıtyndaǵy reıtıngin jaqsartty, dep habarlaıdy QazAqparat Sports.kz saıtyna silteme jasap.

Júkembaev birinshi raýndta-aq óz qarsylasyn tehnıkalyq nokaýtqa túsirip, jeńiske jetken bolatyn. Osydan keıin ol BoxRec-tiń jartylaı orta salmaqtaǵy reıtınginde alty pozıtsııaǵa kóterilip, 22-orynǵa ornalasty. Qazirgi ýaqytta tizimniń kósh basynda WBA jáne WBC Diamond chempıony amerıkalyq Redjıs Progreıs (24-0, 20 KO) tur.

Eske salaıyq, bıyl Batyr Júkembaev eki jekpe-jek ótkizdi. Ol 16 naýryzdaǵy aıqasynda dál osy Monreal qalasynda ótkizip, meksıkalyq Hılberto Mesany (10-5-1, 6 KO) tóreshilerdiń biraýyzdy sheshimimen jeńgen edi.

Onyń osy jolǵy qarsylasy «Kotto» laqap atymen belgili meksıkalyq Lýıs Hesýs Vıdales 30 jasta. Ol 2011 jyldan beri kásipqoı boksta. Bir kezdesýden basqasynyń bárin Meksıkada ótkizgen. Barlyǵy 10 raýnd josparlanǵan bolatyn.

Qazaqstandyqtar Júkembaev-«Kotto» jekpe-jegin búgin tańerteń «Habar» arnasynan tikeleı efırden tamashalaı aldy.