Qarsylastarymyzdyń osaly joq - Bokstan Ulttyq quramanyń bas bapkeri
QazAqparat tilshisi osy kúnderi Olımpıadaǵa irikteý týrnıri ótip jatqan Iordanııanyń Amman qalasynda júrgen bas bapkerge áleýmettik jeli arqyly habarlasqan edi.
- Ǵalymbek Qalıuly, keshegi kún, ıaǵnı Nursultan ýaqytymen 8 naýryzdan 9 naýryzǵa qaraǵan tún ózińiz baptaıtyn boksshylar úshin asa sátti bolǵany belgili. Sharshy alańǵa shyqqan 5 boksshyńyzdyń beseýi de Olımpıadaǵa joldama aldy. Qýanyshyńyzben bólise ketseńiz...
- Árıne, bul ulken jetistik. Biraq, Olımpıadaǵa 5 joldama jeńip aldyq eken dep, bosańsýǵa áli erte. Búgin de lıtsenzııaǵa talasatyn úsh boksshymyz bar. Sondyqtan, jarys aıaqtalmaı jatyp, bórkimizdi aspanǵa atýǵa bolmaıdy.
- Amman qalasyna attanar aldynda qansha joldama alý josparlanǵan edi?
- Negizi, 6 joldamaǵa qol jetkizsek degen josparymyz bolǵan. Al, jospardy artyǵymen oryndap jatsaq, nur ústine nur bolar edi.
- Jalpy irikteý týrnıri qalaı ótip jatyr? Qalǵan úsh lıtsenzııaǵa qol jetkizý múmkindigimiz jaıly aıta ketseńiz?
- Bul jaı týrnırlerdiń biri emes, Tokıoǵa joldamalar sarapqa salynyp jatqan doda. Sondyqtan barlyq eldiń boksshylary joǵary daıyndyqpen kelgen. Uıymdastyrý jaǵy da joǵary deńgeıde. Ózderińiz tikeleı efırden kórip jatqan bolarsyzdar, qarsylastarymyzdyń osaly joq. Endi qalǵan úsh boksshymyz joldama úshin baryn salatyny anyq. Al lıtsenzııa utyp alǵandary altyn medal úshin aıanbaı judyryqtasady degen úmittemiz.
- Alǵashqyda Olımpıadaǵa irikteý týrnıri Qytaıda ótýi tıis edi. Alaıda, koronavırýstyń órshýine baılanysty ótetin ornymen qatar, ýaqyty da ózgerdi. Bul ózgeristerdiń boksshylarǵa keri áseri boldy ma?
- Joq, eshqandaı keri áseri bolyp jatqan joq. Boksshylarymyz ózgeristerge baılanysty babyn joǵaltqan joq. Barlyǵy ózimizdiń josparymyz boıynsha ótip jatyr.
- Áńgimeńizge rahmet! Tolyq quramda joldama jeńip alýǵa tilekshimiz....
Eske salaıyq, 8 naýryzdan 9 naýryzǵa qaraǵan túni erler quramasynan 5 boksshymyz Olımpıada lıtsenzııasyn jeńip aldy. Olar - 69 keli salmaqta Abylaıhan Júsipov, 81 keli salmaqta Bekzat Nurdáýletov, 91 keli salmaqta Vasılıı Levıt, 75 keli salmaqta Ábilhan Amanqul jáne asa aýyr salmaqta (+91) el namysyn qorǵap jatqan Qamshybek Qońqabaev.
Áıelder quramasynan Tokıoǵa ázirge Nadejda Rıabets baratyny belgili.