Qarsybaevtar áýleti «Mereıli otbasy» atandy - Túrkistan oblysy
TÚRKІSTAN. QazAqparat - Túrkistan qalasynda «Mereıli otbasy - 2019» ulttyq baıqaýynyń oblystyq kezeńiniń jeńimpazdary marapattaldy. Saltanatty sharany Túrkistan oblysy ákimdigi jáne óńirlik Otbasy, balalar jáne jastar isteri jónindegi basqarma uıymdastyrdy, dep habarlaıdy QazAqparat tilshisi.
Jyl saıyn dástúrli túrde uıymdastyrylatyn baıqaý bıyl altynshy ret ótkizildi. Adamgershilik qundylyqtardy qaıta jańǵyrtý men otbasy mártebesin kóterýge baǵyttalǵan baıqaýǵa 16 aýdan-qaladan 58 otbasy qatysty. Arnaıy komıssııanyń sheshimimen olardyń arasynan 30 otbasy úzdik dep tanyldy. Qorytyndy kezeńde oblys ákimi Ómirzaq Shókeevtiń alǵys hatymen barlyq 28 otbasy (laýreattary) 200 myń teńge qarjylaı syılyqpen marapattaldy. Al Shardara aýdanynan Qarsybaevtar men Báıdibek aýdanynan Erkebaevtardyń otbasylary - 1 mln teńgeden aqshalaı syılyqqa ıe boldy.
«Mereıli otbasy - 2019» konkýrsynda jeńimpaz dep tanylǵan eki januıa qyrkúıek aıyndaǵy otbasy kúnine oraı ótetin respýblıkalyq baıqaýǵa qatysyp, oblys namysyn qorǵaıdy.
Aıta keteıik, Túrkistan oblystyq «Olımpıada rezerviniń mamandandyrylǵan № 4 balalar men jasóspirimderdiń sport mektebi» MKQK dırektory Arman Qarsybaev armrestlıngten Azııanyń absolıýtti chempıony. 2001-2017 jyldar aralyǵynda Ońtústik Qazaqstan oblysynda Armrestlıng sportynyń negizin qalaǵan, 2005 jyly Tokıoda ótken armrestlıngten Álem chempıonatynyń jeńimpazy, sporttyń osy túrinen QR-dyń Halyqaralyq dárejedegi sport sheberi, el chempıony, Qazaqstan Respýblıkasyna eńbegi sińgen jattyqtyrýshy. Sondaı-aq Azııa chempıony, Azııa kýbogynyń ıegeri, «Shardara aýdanynyń Qurmetti azamaty». Ol sporttyń bıik shyńyn ózi ǵana baǵyndyryp qoımaı, 25 álem chempıonyn, 29 álem chempıonatynyń júldegerlerin, 19 álem kýbogynyń ıegerin, 132 Azııa chempıonyn tárbıelegen bapker.
Úlken uly -Dııar Armanuly da áke jolyn qýyp, bokspen aınalysady. Qazir sport sheberine úmitker, Qazaqstan Ulttyq qurama komandasynyń múshesi, Halyqaralyq týrnırlerdiń jeńimpazy. Ekinshi uly Danııar armrestlıngten Qazaqstan Respýblıkasynyń chempıony, sport sheberi, Qazaqstan Ulttyq qurama komandasynyń múshesi. Qyzdary Aıajan men Arýjan mektep oqýshysy bolsa, kenjesi Asylaı balabaqsha tárbıelenýshisi. Anasy Kúlsara zeınetker, tyl ardageri. «Álemniń asyly» medaliniń ıegeri. «Baqytty basqadan emes, balańnan izde», - degen Arman Qarsybaev pen jary Gúlmıra búginde ónegeli otbasyn quryp otyr.
