Qarsylasyn nokaýtpen jeńgen Zarına Tolybaı el qorjynyna alǵashqy medaldi saldy
ASTANA. KAZINFORM – Qazaqstandyq boksshy Zarına Tolybaı Chernogorııanyń Býdva qalasynda ótip jatqan bıylǵy jasóspirimder arasyndaǵy álem chempıonatynyń shırek fınalynda jekpe-jek ótkizdi, dep habarlaıdy Sports.kz saıty.
80 keliden joǵary salmaq dárejesinde Zarına Tolybaı Tývalý ókili Frentsıs Taafakımen kezdesti. Qazaqstandyq sportshynyń basymdyǵymen ótken jekpe-jek ekinshi raýndta tehnıkalyq nokaýtpen aıaqtaldy.
Jekpe-jek barysynda tóreshi qarsylasqa úsh ret nokdaýn, al qazaqstandyq boksshyǵa bir ret nokdaýn sanady.
Osy jeńistiń arqasynda Zarına Tolybaı jartylaı fınalǵa shyǵyp, álem chempıonatynyń kem degende qola medalin ıelenýdi qamtamasyz etti. Bul – Qazaqstan quramasynyń osy týrnırdegi alǵashqy kepildi medali.
Aıta keteıik, Zarına Tolybaı – jasóspirimder arasyndaǵy (U-19) Azııanyń qazirgi chempıony. Endi ol álem chempıonatynyń fınalyna shyǵý úshin túrkııalyq Mıraı Dogrýmen kezdesedi.
Býdva qalasynda ótip jatqan bul álem birinshiligi 27 qazanda aıaqtalady. Týrnırge 69 ulttyq federatsııadan 474 boksshy qatysyp jatyr.
Aıta keteıik, buǵan deıin Bıbarys Áshirbaı álem chempıonatynda alǵashqy qarsylasyn jeńgenin jazdyq.
