Qarsylasyn 57-sekýndta nokaýtqa túsirgen: kýrsant BoxRec álemdik reıtınginiń úzdik ondyǵyna endi
ASTANA. KAZINFORM – Bokstan Qazaqstan Respýblıkasynyń sport sheberi, kadetter men jastar arasyndaǵy eki dúrkin el chempıony, Azııanyń qola júldegeri jáne halyqaralyq týrnırlerdiń jeńimpazy Álı Baýyrjan kásipqoı boksta aıtarlyqtaı sensatsııalyq nátıje kórsetti, dep habarlaıdy INFORMSPORTS.
Álemdik kásipqoı bokstyń eń bedeldi ári táýelsiz kompıýterlik algorıtmge negizdelgen BoxRec portalynyń resmı reıtınginde otandasymyz óz salmaq dárejesi boıynsha Qazaqstanda jáne TMD elderi arasynda 9-orynǵa kóterilip, úzdik ondyqqa endi. Bul – TMD tarıhynda kásipqoı rıngte mundaı joǵary satyǵa kóterilgen tuńǵysh qazaqstandyq kýrsanttyń kórsetkishi.
Álı – QR ІІM Bárimbek Beısenov atyndaǵy Qaraǵandy akademııasynyń 4-kýrs kýrsanty. Ol bolashaq polıtsııa ofıtseriniń qatań tártibi men kazarmalyq ómirin úlken sportpen sátti ushtastyryp keledi. Sonymen qatar Jambyl oblysy Polıtsııa departamentiniń «Arlan» sport klýbynyń namysyn abyroımen qorǵap júr. Jaqynda ǵana Taraz qalasynda ótken halyqaralyq boks týrnırinde tájikstandyq qarsylasyn jekpe-jektiń nebári 57-sekýndynda nokaýtqa túsirdi.
Jas darynnyń halyqaralyq arenadaǵy osynaý tolaǵaı tabystary men otandyq sportty damytýǵa qosqan zor úlesi memleket tarapynan da joǵary baǵalandy. QR Týrızm jáne sport mınıstriniń buıryǵymen Baýyrjan Álı «Qazaqstan Respýblıkasynyń sport salasynyń qurmetti qyzmetkeri» tósbelgisimen jáne Qurmet gramotasymen marapattaldy.
Aıta ketelik Abylaıhan Jubanazar dzıýdodan álem chempıonatynyń qola medali úshin baq synaıdy.
