Qarsylasymnyń boıy uzyn bolǵanymen kúshi asyp tur dep aıta almaımyn – Nurlyhan Sharhan

PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda dzıýdodan erler arasynda Nurlyhan Sharhan ekinshi beldesýinde qarsylasyna jol bergen bolatyn.

Jarystan keıin kóz jasyna erik bergen otandasymyz jýrnalısterge suhbat berýden bas tartyp, eshkimmen sóılespeı kıim aýystyrý bólmesine ketip qalǵan bolatyn. Sálden keıin, balýanymyzdyń terin qurǵatpaı turyp, shaǵyn pikirin jazyp alyp alýǵa múmkindik aldyq.

«Birinshi beldesýimde belgııalyq balýandy jeńgenimmen, ekinshi beldesýde ózbekke utylyp qaldym. Negizi, shamam kelgenshe ashyq, taza kúrestim. Bapkerlerimniń tapsyrmasyn da múltiksiz oryndadym. Men eshqandaı sharshaǵan da joqpyn. Qarsylasymnyń boıy uzyn bolǵanymen kúshi menen asyp tur dep aıta almaımyn. Onyń boıynyń uzyndyǵy maǵan esh qolaısyzdyq týdyrǵan joq. Maǵan tek sáttilik jetispeı qaldy dep oılaımyn. Tóreshilerge eshqandaı ókpem joq. Qatelikterdiń barlyǵy ózimnen boldy dep esepteımin. Qarsylasymnyń boıynyń uzyndyǵy da maǵan eshqandaı qolaısyzdyq týdyrǵan joq. Olımpıada degen ózi osyndaı jarys qoı, barlyǵyna sabyrmen, tózimmen qaraý kerek. Ózim boıymdaǵy bar kúshimdi saldym dep oılaımyn. Kelesi Olımpıada oıyndary buıyryp jatsa jeńiske jetýge tyrysamyn. Meni qoldaǵan jankúıerlerime, otandastaryma, otbasyma alǵysymdy aıtamyn», - dedi dzıýdoshy.

Esterińizge sala keteıik, jalpy Parıj Olımpıadasyna erlerden 5, áıelderden 3 dzıýdoshy kelgen bolatyn. Osymen erler arasynda el namysyn qorǵaıtyn tatamı sheberleri Olımpıadany tolyǵymen aıaqtady. Erler quramasynyń qorjynynda 1 altyn, 1 qola medal bar.

Endi, áıelder arasynda bir ǵana dzıýdoshy qaldy. Kamıla Berliqash (78 kg) 3 tamyz kúni tatamıge shyǵady.