Qarsylas alǵashynda bizdi mensinbedi, endi bar kúsh-jigerin salady – «Qaırat» bapkeri

ALMATY. KAZINFORM – Almatyda «Qaırat» pen «Seltık» komandalary arasyndaǵy qarymta oıynnyń aldynda baspasóz máslıhaty ótti.

26 tamyz kúni Almatynyń Ortalyq stadıonynda «Qaırat» pen «Seltık» arasynda ÝEFA Chempıondar lıgasy irikteýiniń pleı-off kezeńiniń qarymta oıyny ótedi. Alǵashqy kezdesý Glazgoda 0:0 esebimen teń aıaqtaldy.

— Aldaǵy oıyn – bizdiń klýb úshin, búkil Qazaqstan úshin, qala men jankúıerler úshin úlken oqıǵa. Chempıondar lıgasy bizdiń qalamyzǵa kelgenine óte qýanyshtymyz. Bul biz úshin úlken mereke. Jankúıerlerimizdiń qoldaýyna senemiz, jaqsy oıyn kórsetip, kórermenderimizdi qýantqymyz keledi, — dedi Rafael Ýrazbahtın.

Sondaı-aq bas bapkerdiń aıtýynsha, oıynǵa «Qaırattyń» keı oıynshylary qatysa almaıdy: birneshe oıynshy jaraqat alǵan jáne 17 jastaǵy Dastan Satpaev sary qaǵaz sanynyń kóptigine baılanysty bir oıynǵa shettetildi.

— Iá, ókinishke qaraı, bizde qıyndyqtar bar. Oınamaıtyn jigitterdiń árqaısysy biz úshin mańyzdy edi. Biraq olardy almastyratyn oıynshylarǵa senemiz. Olarǵa ózderin kórsetýge múmkindik beriledi jáne olar osy múmkindikti paıdalanady dep oılaımyn, — dedi ol.

«Qaırat» jattyqtyrýshysy komandanyń jas juldyzy Sátpaevtyń bul jaǵdaıdy aýyr qabyldaǵanyn atap ótti.

— Ol qatty ýaıymdady. Bilýimshe, eki kún eshkimmen sóılespeı qoıdy. Ol bárin jaqsy túsinedi. Biz óz tarapymyzdan qoldaý kórsetip jatyrmyz. Biraq bul — ómir, osy arqyly tájirıbe alyp jatyr. Ol tek kúsheıip keledi. Durys qorytyndy jasap, ary qaraı júrý kerek, — dedi Rafael Ýrazbahtın.

Bapker komandanyń negizgi qaqpashy Aleksandr Zarýtskııdiń jaǵdaıyna da toqtaldy. Onyń maýsym sońyna deıin alańǵa shyqpaıtyny týraly aqparatty Rafael Ýrazbahtın joqqa shyǵardy. Qaqpashy bulshyq ettiń azdap sozylýyna baılanysty shamamen bir aıdaı alańǵa shyqpaıdy.

Qarsylas jaıly pikir

Almatylyq klýbtyń bapkeri qarsylastyń deńgeıin joǵary baǵalady.

— «Seltık» — deńgeıi joǵary, top komanda. Bul qupııa emes: ol komandadaǵy bir fýtbolshy bizdiń búkil komandanyń qunymen teń turady. Sondyqtan olardyń árbir oıynshysy biz úshin úlken qaýip tóndiredi. Jyldam ári qaýipti shabýyldaýshylary bar, ár pozıtsııada bilikti fýtbolshylar oınaıdy. Bireýdi bólip aıta almaımyn — biz ár oıynshydan saqtanýymyz jáne «Seltıkti» tutas komanda retinde qabyldaýymyz qajet. Barlyǵyna muqııat qaraımyz, — dedi ol.

Sondaı-aq bapker Almatydaǵy matchta qarsylastyń jigerlene oınaıtynyn boljady.

— Menińshe, «Seltık» oıynshylary bizdi óz alańynda azdap mensinbegen syńaıly. Endi olar bizdiń oıynymyzǵa basqasha qaraıdy. Basqa motıvatsııamen, basqa kóńil-kúımen shyǵady. Olar bizdi jeńý úshin keledi. Al biz óz kezegimizde soǵan jol bermeýge tyrysamyz jáne jeńiske jetýge tyrysamyz, — dedi ol.

Jýrnalıster «Seltık» Qazaqstanǵa birneshe ret kelip, biraq eshqashan jeńiske jete almaǵanyn (eki jeńilis, bir teń oıyn) eske saldy. Biraq bapker bul statıstıkaǵa mán bermeıtinin aıtty.

— Burynǵy nátıjelerge súıenýdiń qajeti joq dep oılaımyn. Erteń naqty match, naqty komandalar óz mindetterin oryndaıdy. Biz oǵan kóp mán bermeımiz. Barlyǵy erteń sheshiledi, — dedi ol.

Eske salaıyq, «Qaırat» - «Seltık» matchynda qaýipsizdikti 1,5 myń polıtsııa qyzmetkeri qamtamasyz etedi.

Buǵan deıin «Qaırat» - «Seltık» matchyna alypsatarlar bıletti 5 myńnan 100 myń teńgege deıin satyp jatqanyn jazǵanbyz.