Qarshyǵa atty sáıgúlik ıesi «Shevrolet Niva» kóligin jeńip aldy
KÓKShETAÝ. QazAqparat - Esil turǵyny Jaqsylyq Qusaıynovtyń tulpary týǵan ólkeniń mereıtoıy aıasynda uıymdastyrylǵan alaman báıgeniń júırigi atandy, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Esil ıppodromynda qalanyń 55 jyldyǵyna arnap at jarysy ótkizildi. Onda respýblıkanyń 20 óńiri men eldi mekenderinen kelgen sáıgúlikter 7, 14 shaqyrymdyq báıge jáne 21 shaqyrymdyq alaman báıge boıynsha jarysty. Jarystyń júlde qoryna 2 jeńil kólik qoıyldy.
«Báıge qorytyndylary boıynsha, 7 shaqyrymda Shyǵys Qazaqstan oblysynan kelgen Esentur shabandoz Iman atymen jeńiske jetti. 14 shaqyrymda Sabyr atty tulparymen jarysqan ShQO turǵyny Myqtybek úzdik atanyp, «LADA Granta» kóligin jeńip aldy.
Qyzý ótken alaman báıgege tigilgen «Shevrolet Niva» avtomobılin Qarshyǵa atty tulparymen Esil turǵyny Jaqsylyq Qusaıynov utyp aldy.
Shabandoz Qadyrjan jarysta sheberligin tanytyp, sońǵy metrlerde Aıan Jolamannan jeńisti julyp áketti», - deıdi vedomstvo ókilderi.
Astanadan kelgen Ivan Shathovıchtiń komandasynyń óneri kórermenderdiń kózaıymyna aınaldy. Bapker Erjan Maǵjaevtyń belgili shákirtteri - Vıktorııa Kotına, Darıa Jarakova, Marııa Igýpaeva, Abzal Narynbaılar shabandozdyq jáne ulttyq at sporty boıynsha tamasha ónerlerin kórsetti.
