Qarshyǵa Ahmedııarovtyń otbasy qazaqstandyqtarǵa qıyn kezeńde qoldaý bildirgenderi úshin alǵysyn bildirdi

«2010 jyly maýsymnyń 6-shy juldyzynda Atyraý eline jetken qaraly habardy alyp, eseńgirep otyrǵan kezimizde, qaıǵymyzǵa ortaqtasyp, otbasymyzǵa kóp demeý kórsetkenderińiz úshin, Qazaqstan Respýblıkasynyń Prezıdenti Nursultan Ábishuly Nazarbaevqa, Respýblıka Úkimeti, Májilisi jáne Senat tóraǵalaryna, Qazaqstan Respýblıkasynyń Mádenıet mınıstrligine, Astana, Almaty qalalarynyń jáne barsha oblys ákimderine, eńbek ujymdaryna, oqý oryndary men mádenı oshaq basshylaryna, teatr-óner qaıratkerleri men Qazaqtyń jaqsylary men jaısańdaryna, aqyn-jazýshylarǵa, táýelsiz buqaralyq aqparat kózderine, redıo jáne televızııa basshylaryna, sondaı-aq, aǵaıyn-týys, quda-jekjat, dos-jaranǵa, basymyzǵa túsken orny tolmas aýyr qazaǵa ortaqtasyp, kóńil aıtqan, aýyrtpalyqty kóterisip, bólisken, bas súıegen Barshańyzǵa rızashylyq sezimimizdi bildirip, shyn júrekten Alǵysymyzdy aıtamyz», - delingen hatta.

QazAqparat buryn habarlaǵandaı, qazaqtyń belgili kompozıtory, kúıshi, dombyrashy, QR Halyq ártisi Qarshyǵa Ahmedııarov Almatyda 2010 jyldyń maýsymynda, 65 jasynda qaıtys bolǵan.

Qarshyǵa Ahmedııarov 1946 jyly naýryzdyń 25-inde Atyraý oblysy, Mahambet aýdanynyń Tańdaı aýylynda dúnıege keldi.

1972 jyly Almaty konservatorııasynyń halyq aspaptary fakýltetin bitirdi. Qalı Jantileýov, Qubash Muhıtov, Ýálı Bekenov sııaqty kúı maıtalmandarynan dáris alyp, úlken óner jolyna túsedi. 1967 jyldan bastap Qurmanǵazy atyndaǵy akademııalyq halyq aspaptar orkestrinde dombyrashy, kontsertmeıster qyzmetterin atqarady. Q.Ahmedııarovtyń repetýarynda qazaqtyń halyq sazgerleriniń kúıleri, orys jáne Batys Eýropa sazgerleriniń belgili shyǵarmalary oryn aldy. 1974 jyldan Almaty konservatorııasynda pedagogıkalyq qyzmetpen shuǵyldanady, dombyra kafedrasyn basqarady. Ǵylymı-zertteý jumystarmen aınalysyp, ol óńdegen qazaq sazgerleriniń shyǵarmalary mýzykalyq oqý oryndarynda jáne kontsertterde oryndaldy.
Q.Ahmedııarov tek sheber oryndaýshy ǵana emes, ol zerdeli zertteýshi, 60-tan astam kúı shyǵarǵan talantty kompozıtor retinde de tanylǵan tulǵa. Onyń «Shashaqty naıza, shalqar kúı» atty kitaby, «Naryn», «Qýanysh», «Saǵynysh», «Nurǵısa», «Qyz-ǵumyr», «Aqqaıyń», «Jeldirme», «Altyn uıa» jáne t.b. kúıleri elge keńinen tanymal. «Atyraý», «Saryarqa», «Jiger», «Ásem qońyr», «Shynar», «Tabyný» atty kúıler jınaǵy jaryq kórdi. 500-den asa kúıleri radıo, teledıdar muraǵattarynda saqtaýly.

Talantty mýzykant gastroldi saparmen dúnıe júziniń kóptegen elderinde bolyp, qazaqtyń qara dombyrasynyń ásem sazyn tanytty.

Qazaq mýzyka ónerin damytýdaǵy joǵary shyǵarmashylyq jetistikteri úshin Q.Ahmedıarovqa 1982 jyly Qazaqstan Respýblıkasynyń Memlekettik syılyǵy, 1992 jyly Qazaqstan Respýblıkasynyń halyq ártisi ataqtary berildi. 2000 jyly «Parasat» ordenimen marapattaldy.