Qarshyǵa Ahmedııarov - Edil men Jaıyqtaı qos ishekti dombyrany búgingi urpaqqa amanat etti - Imanǵalı Tasmaǵambetov
ALMATY. Maýsymnyń 8-i. QazAqparat /Názıra Eleýhan/ - Búgin qazaq halqynyń, qazaq óneriniń bir qabyrǵasy qulady. Qazaq degen halyqtyń ózge elden erekshe bir óneri bolsa, bul - kúı óneri. Sol ónerdiń sonaý Qurmanǵazy, Táttimbet, Dáýletkereı, Qazanǵap pen Dınanyń ómirdegi ózindeı, ónerdegi kózindeı bolǵan Qarshyǵa Ahmedııarov ómirden ótti.
HH-shy ǵasyrda qazaqtyń kúı óneri joıyla jazdap, tili men dili talan-tarajǵa túsken shaqta Qarshyǵa qanatymen sý sepkendeı, qazaqtyń kúı ónerin saqtap qaldy. Edil men Jaıyqtaı qos ishekti dombyrany kesheden búginge aman tabystap, búgingi urpaqqa amanat etti, dedi búgin Almatyda dombyrashy, kúıshi, kompozıtor, Qazaqstannyń halyq ártisi Qarshyǵa Ahmedııarovty sońǵy saparǵa shyǵaryp salý kezinde Astana qalasynyń ákimi Imanǵalı Tasmaǵambetov.
QR eńbek sińirgen ártisi, kúıshi Raqym Tájibaevtyń pikirinshe, Qarshyǵa Ahmedııarov - kúı óneriniń Qarshyǵasy, kúıshilerdiń arasyndaǵy eń jaryq juldyzdyń biri. «Qarshyǵanyń esimi máńgi ólmek emes. Óıtkeni, onyń artynda ulan ǵaıyr eńbegi, shyǵarmalary, shákirtteri qaldy. Sońynda máńgi esinde ustaıtyn halqy bar, onyń halqyna istegen eńbegi máńgi umytylmaq emes», dedi ol.
Qarshyǵa Ahmedııarovtyń shákirti, búginde elimizge tanymal bolǵan oryndaýshy Asylbek Eńsepovtyń aıtýynsha, ol kisi onyń pir tutatyn ustazy. «Men mektep jasynan Qarshyǵa Ahmedııarovty bilemin. Men ustazdarymnyń ishinde eń aldymen Qarshyǵa Ahmedııarovty birinshi orynǵa qoıamyn. Sondyqtan, ol kisige uqsaǵym keledi. Konservatorııada oqyp júrgen kezimde, keıinnen de, dástúrli mýzykada, shyǵarmashylyqta ol kisi maǵan durys jol siltep otyratyn. Men uly sheber adamnan bilim alǵandyǵymdy maqtan tutamyn», dedi ol.
"Kókil" mektebiniń dırektory Abdýlhamıt Raıymbergenovtyń aıtýynsha, Qarshyǵa Ahmedııarov syndy oryndaýshylardyń arqasynda dástúrli mýzyka ómir súrýde. «Qarshyǵa aǵamyz sııaqty tulǵalar ǵasyrda bir ret týady. Ol kisi uly qazaq kompozıtorlarynyń izin jalǵastyrýshy, ári saqtaýshy. Onyń oryndaýyndaǵy Mahambet kúıi jańa ómir alǵan bolatyn. Qarshyǵa Ahmedııarov - barlyq dombyrashylar úshin joǵary deńgeıli sheber oryndaýshy bolyp qalady. Onyń ónerge degen adal qyzmeti - barlyq shákirtteri men oqýshylaryna mysal bolyp qalary sózsiz», dedi ol.
