Karpovty jeńgen jumysshy men Dármen Sádýaqasovtyń oıyny qalaı aıaqtaldy

Olardyń ishinde qarapaıym jumysshylar da, keńse mamandary da bar. Seansqa qatysý úshin barlyǵy Eýrazııalyq topqa kiretin kompanııalar arasyndaǵy jarystar kezinde irikteldi. Biraq bir adam - qarapaıym jumysshy Igor Sannıkov irikteýge qatyspady. Sebebi osydan bes jyl buryn halyqaralyq grossmeıster Anatolıı Karpovty jeńgen bolatyn.

Osy jolǵy seansqa elimizdiń tanymal shahmatshysy Dármen Sádýaqasov shaqyryldy. 24 jasynda ol shahmat áleminde ańyzǵa aınalǵan Vıktor Korchnoıdy 5-3 esebimen jeńse, bir jyldan keıin Anatolıı Karpovty utyp ketti. Búginde Dármen 39 jasta. Onyń aıtýynsha, shahmattan ashyq seans pen jeke oıynnyń aıyrmashylyǵy kóp. Sebebi seans kezinde bir emes, birneshe adamǵa qarsy oınaý qajet.

«Negizi, shahmatshy qatar birneshe adammen oınaǵanda óziniń barlyq mashyqtaryn paıdalanady. Ol Gennadıı Golovkınniń 20 boksshymen qatar judyryqtasqanymen birdeı. Árıne, birneshe adammen oınaǵanda kóp oılanýǵa ýaqyt joq. Biraq jeke tájirıbeniń arqasynda jyldam oınaýǵa múmkindik bar. Al oǵan qarsy oınaǵandarǵa jeńildeý. Sebebi ol bir aınalyp kelgenshe biraz oılanyp alýǵa bolady. Degenmen, seans sonysymen qyzyqty. Bir adamda ýaqyt bolmaıdy, biraq tájirıbeniń arqasynda birneshe adamǵa qarsy oınaı alady», - deıdi D.Sádýaqasov.

Dármen seanstarǵa tyńǵylyqty daıyndalyp, jeńilmeýge tyrysady. Degenmen, teń oıyndar bolady, jeńilister de joq emes. «Eger qarsylas shynymen de jaqsy oınasa, men teń oıyndy usynamyn. Árıne, jeke tájirıbeniń arqasynda jeńýge bolady. Biraq oǵan kóp ýaqyt ketedi. Sosyn seansta myqty oınaıtyn adamdar da bolýy kerek qoı. Negizi, jaqsy oınaıtyn adamdar bolady. Men ózim osyndaı seanstar kezinde birneshe ret utyldym. Biraq ondaı jaǵdaılar óte sırek bolady. Kásibı shahmatshylardyń jumysy aýyr. Olar apta saıyn 1 500-ǵa jýyq partııany zerttep otyrady. Budan bólek, debıýttik jańalyqtardy da baqylap otyrý qajet. Sebebi shahmat - bul sport ári ǵylym. Sondyqtan shahmatshylar úlken analıtıkalyq jumysty jasap otyrady», - dep atap kórsetti D.Sádýaqasov.

Onyń aıtýynsha, shahmattan ashyq seanstardyń ótkizýdiń paıdasy kóp. Ásirese, balalar halyqaralyq grossmeıstermen oınaýǵa qatty qyzyǵady. Ondaı seanstardan keıin balalar shahmatqa kóptep jazylady. «Negizi, shahmat adamnyń boıynda logıka, este saqtaý, sheshim qabyldaý jáne taǵy basqa mańyzdy qabiletterdi ushtaýǵa kómektesedi. Shahmattyń arqasynda balalardyń sabaq úlgerimi de jaqsarady. Álem boıynsha ony fakýltatıvti pán retinde paıdalanady. Al keıbir memleketter shahmatty mektep baǵdarlamasyna mindetti pán retinde engizdi», - dep atap kórsetti D.Sádýaqasov.

Búgingi seansqa osydan bes jyl buryn Anatolıı Karpovty jeńgen «Qazaqstan alıýmınııi» AQ zaýytynyń ýchaske sheberi Igor Sannıkov ta qatysty. Biraq Dármendi jeńe almady. «Endi, Karpovpen oınaǵanda sáttilik serik boldy. Ol qatelik jiberip qoıdy. Endi, qatar birneshe adammen oınaǵan ońaı deısiz be? Áıteýir, bir qatelik ketedi. Sol qatelik maǵan buıyrǵan shyǵar. Ózim shahmatty 6 jastan bastap oınaımyn. Sport sheberi ataǵyna kandıdatpyn. Dármendi jeńe almadym. Shyny kerek, myqty shahmatshy. Oǵan búgingi oıynda taǵy da kózim jetti», - dedi I.Sannıkov QazAqparat tilshisine bergen suhbatynda.

Jalpy, seanstyń qorytyndysy boıynsha 8 teń oıyn tirkeldi. Dármen Sádýaqasovtyń aıtýynsha, búgin aýyr seanstardyń biri boldy. «Iá, bul qıyn seanstardyń biri boldy. Biraq men Karpov emespin, jeńilgen joqpyn. Negizi, men eki jylda 10-15 seans ótkizip turamyn. Árıne, kóbinese, balalarmen oınaımyz. Bir rette Bas prokýratýra qyzmetkerlerimen oınadyq. Ol kezde teń oıyndar bolǵan joq. Al osy joly jaqsy seans boldy, teń oıyndar da tirkeldi. Basynda bárin eki saǵatta bitiremiz dep oılaǵanbyz. Joq, búgingi seans úsh jarym saǵatqa sozyldy», - dep atap kórsetti D.Sádýaqasov.

Aıta keteıik, búgingi seans aıasynda Dármen Sádýaqasov jýrnalısterge suhbat berip, shahmatshy Bıbisara Asaýbaevanyń Reseıden qaıtyp kelýine qatysty óz pikirin bildirdi. «Men ózim Bıbisaranyń talantyna tántimin. Áli esimde, 6 jasynda bolǵanda men ony testen ótkizdim. Sol kezde onyń qabiletin kórip, anasyna birden aıttym. Onyń boıynda sırek kezdesetin talant, myqty tabıǵı qabilet bar. Ol bir nársege zeıin qoıyp, uzaq otyra alady. Ony «zeıin kontsentratsııasy» deıdi. Dál osy kontsentratsııany Bıbisara uzaq ýaqyt ustap otyra alady. Negizi, ár adamnyń zeıin qoıý qabileti ártúrli. Al Bıbisara test kezinde óte jaqsy nátıje kórsetti. Shahmatshy úshin bul asa qajetti qabilet, asa úlken artyqshylyq», - deıdi D.Sádýaqasov.

Onyń aıtýynsha, Qazaqstanda myqty shahmatshy jigitter de bar.

Aldaǵy ýaqytta Qazaqstannyń shahmat federatsııasy QR Bilim jáne ǵylym mınıstrliginiń basshylyǵymen kezdesip, shahmatty mektep baǵdarlamasyna engizý máselesin talqylaýdy josparlap otyr.