«Qarmettiń» jylý-elektr ortalyqtary ekologııalyq ruqsat rásimdeýden bosatylady
ASTANA. KAZINFORM – «Qarmet» aktsıonerlik qoǵamynyń jylý-elektr ortalyqtary 2031 jylǵa deıin keshendi ekologııalyq ruqsat alý rásiminen bosatylady.
2025 jyldyń birinshi qańtarynan bastap eldegi qorshaǵan ortaǵa eń kóp shyǵaryndy tastaıtyn 50 kásiporynnyń tizimi ashyq jarııalanýy kerek bolǵan. Bul kásiporyndar jumysyn kidirissiz jalǵastyrý úshin keshendi ekologııalyq ruqsat alýy qajet. Al ol ruqsatty alý úshin Qazaqstan zańnamasynda kórsetilgen ekologııalyq talaptardyń bárine saı bolýy shart.
Energetıka mınıstrligi kópshilik talqylaýyna shyǵarǵan buıryq jobasynda osy tizimge enýi kerek bolǵan «Qarmet» aktsıonerlik qoǵamyna tıesili jylý-elektr ortalyqtaryn osy tizimnen 2031 jylǵa deıin shyǵara turýdy usynǵan. ıAǵnı, osy kezeńde keshendi ekologııalyq ruqsat alýdan bosatylady.
«Qazirgi tańda Qazaqstanda elektr energetıkasy daǵdarys jaǵdaıynda. Óndirýshi jabdyqtardyń, ǵımarattardyń, qurylystardyń, jelilerdiń jáne basqa da energetıkalyq ınfraqurylymnyń tozýy synı mánge jetti. Elimizdiń ártúrli óńirlerindegi energııa obektilerinde turaqty negizde apattyq jaǵdaılar týyndaıdy. Qalyptasqan jaǵdaıdy sheshý úshin Memleket basshysynyń bastamasy boıynsha «Tarıfti ınvestıtsııalarǵa aıyrbastaý» baǵdarlamasy ázirlendi. Ol tozý men apattylyqty ózgertýge, elektr, jylý energııasy men qýat tapshylyǵyn eńserýge baǵyttalǵan is-sharalardy kózdeıdi. Atalǵan baǵdarlamany iske asyrý úshin iri ınvestıtsııalar talap etiledi, olardy qaıtarý aıtarlyqtaı dárejede tarıfterdiń ulǵaıýyna ákeledi. Óz kezeginde, elektr stantsııalarynda eń ozyq qoljetimdi tehnıkany (EQT) engizý úshin el aýqymynda júzdegen mıllıard teńgege esepteletin orasan zor ınvestıtsııalar qajet bolady. Bul tarıfterdiń, onyń ishinde halyq úshin de birneshe ese ósýine alyp keledi. Bul, árıne, áleýmettik shıelenistiń ulǵaıýyna áser etedi. Taǵy bir másele, búgingi kúni Qazaqstanda qajetti tazartý jabdyǵy óndirilmeıdi, tıisinshe qarajattyń negizgi bóligi shetelge osyndaı jabdyq óndiriletin elderge shyǵarylatyn bolady. Joǵaryda aıtylǵandardyń negizinde energııa óndirýshi uıymdar úshin keshendi ekologııalyq ruqsat alý jáne ÚQT engizý merziminiń bastalýyn 2025 jyldan 2031 jylǵa aýystyrýdy kózdeý usynylady», - dep jazylǵan qujattyń negizdemesinde.
Osyǵan deıin «Qarmet» kombınaty jumysyn jańǵyrtýǵa 35 mlrd teńge bóletinin habarladyq.
