Qarmaqshylyq azamat omartashylyqtan mol tabys taýyp otyr
QYZYLORDA. QazAqparat - Qarmaqshy aýdany ІІІ Internatsıonal aýylynda turatyn Býlýt Ismaılov omartashylyq kásipti meńgerip, odan mol paıdaǵa kenelip otyr. Ol sırek kezdesetin kásip túrin damytyp, jergilikti halyqqa sapaly ónim usynýǵa kóńil bólip keledi, dep habarlaıdy QazAqparat tilshisi.
Ol kisi omartashylyq kásipti bala kezden armandaǵan. Degenmen, berige deıin oǵan nazar aýdarýǵa eshbir múmkindigi bolǵan joq. Sharýashylyqta túrli kásipti atqardy. Dánekerleýshi bolyp eńbek etti. Soǵan qaramastan omartashylyqpen aınalysýǵa búıregi buryp turatyn edi. Osylaısha birer jyl buryn ol kisi omartashylyqqa túbegeıli bet burdy.
«Oılaǵan maqsatymdy júzege asyrý úshin otbasymmen aqyldastym. Sodan keıin alǵa qoıǵan josparymdy júzege asyra bastadym. Ras, alǵashqyda istiń nátıjesi qalaı júrer eken degen oıdyń da bolǵanyn jasyra almaımyn. Dese de, oılaǵanymdy júzege asyrýǵa nıet tanyttym», - dedi B.Ismaılov.
Sonyń nátıjesinde ol «Jumyspen qamtý-2020 jol kartasy» baǵdarlamasy arqyly qarjylaı qoldaýǵa qol jetkizdi. Syrdarııa aýdanynyń ortalyǵy - Tereńózek kentindegi omartashylarmen baılanysqa shyqty. Olardan aranyń birneshe uıasyn satyp aldy. Olardyń qataryn kóbeıtýge tyrysty. Búginde tirshiligi túzý, tutynýshylar qatary artyp keledi. Ózi óndirgen bal ónimderin Qyzylorda, Baıqońyr qalalary men Jalaǵash aýdanynan alyp ketetinder bar.
Omartashy aýyldaǵy «Dostyq jer MK» seriktestiginiń №3 brıgadasyndaǵy jońyshqa alqabyna ornalastyrǵan. Ol eldi mekennen 15 shaqyrymdaı qashyqtyqta oryn tepken. Aınala túrli ósimdikterge toly. Bul bal arasyn ósirýge óte qolaıly aımaq sanalady.
«Menen aqyl-keńes suraıtyndar bar. Bilgenimdi úıretýge tyrysamyn. Bul kásip jalyqpaı eńbek etkendi qalaıdy. Kóktemde qar erip, kún jylynady. Omartany qystaqtan shyǵaryp, alańǵa ornatady. Sodan soń ara ósirýshi omartanyń ara ushyp shyǵatyn esigin ashady. Osy sátte gýildep ushqan aralar kórinedi. Olar omarta mańynda ushyp júrip, onyń syrtqy pishinin, sol ortadaǵy zattardyń ornalasý jaǵdaıyn jadyna saqtap qalýǵa tyrysady.
Jaz aıyndaǵy ara jumysynyń sıpaty - tynym tappaı gúl tozańyn jınaý. Oǵan negizgi sebepshi sol jerdegi bal kóp beretin ósimdikterdiń ýaqytynda gúldep, baldy kóp berý», - dedi ol.
Syr óńiri - ara ósirýge qolaıly aımaq. Munda olardyń bal jınaýyna qajetti túrli ósimdikter bar. Sondyqtan sońǵy jyldarda ara ósirýge nıet tanytyp júrgen azamattardyń qatary kóbeıip keledi.
