Qarmaqshydaǵy Jyraýlar úıiniń shákirtteri Ázerbaıjanda jeńimpaz atandy
Qazirgi tańda Jyraýlar úıinde Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy baǵytynda ıgilikti ister atqarylyp keledi.
Jyraýlar úıi 2006 jyly Qarmaqshy aýdanynyń ortalyǵy - Josaly kentinde tusýyn kesti. Oǵan kezinde jyraýlyq ónerdi dáripteý baǵytynda úlken úles qosqan Kósheneı Rústembekovtiń esimi berildi. Sodan bergi jyldarda bul oryn kásiporyn retinde qyzmetin jalǵastyryp, jas urpaqqa ulaǵat syılaıtyn qasıetti shańyraqqa aınaldy.
Búgingi tańda munda barlyǵy alty úıirme bar. Onyń beseýi jyraýlyq ónerdi dáripteýge baǵyttalǵan. Halyq arasynda jıi aıtylatyn «Syr eli - jyr eli» degen naqyl sózdi jergilikti óner ıeleri osylaısha keńinen dáleldep, qanshama ǵasyrdan beri saqtalyp kele jatqan dástúrli ónerdiń deńgeıin bıiktete tústi. Qazirgi kúni óner ordasynda júzden astam jas óren aldyńǵy býynnyń dárisin tyńdap, jyraýlyqtyń móldir bulaǵynan shólin qandyryp keledi.
Jyraýlar úıiniń Turmaǵambet, Kómekbaev, Qýańdarııa, Aqjar aýyldarynda bólimsheleri jumys jasaıdy. Bul shańyraqta Kósheneıdiń týǵan inisi Bıdas Rústembekov qyzmet atqaryp, shákirt baýlý isine zor úlesin qosyp otyr. Búginde shákirtter halyqaralyq deńgeıdegi óner sharalarynda joǵary jetistikterge qol jetkizip keledi. Solardyń biri - Araı Ońǵarqyzy bul baǵytta zor tabystarǵa qol jetkizip úlgerdi. Sondaı-aq, Óner úıiniń ustazdary da tıisti oryndardan alǵys hattar alyp, maqtaý qaǵazdaryna ıe bolyp júr.
Jyraýlar úıiniń shákirtteri Ázerbaıjanda ótken Mýgam festıvalinde elimizdiń abyroıyn asqaqtata tústi. Álemniń 16 memleketinen jas ónerpazdar qatysqan mádenı sharada Toǵjan Baqytova men Dilnaz Tashmuhammed jeńimpaz atanyp qaıtty. Óner ordasynda tálim alyp júrgen jas órender Ózbekstan, Qytaı, Reseı jáne óz elimizdegi baıqaýlardan úlken tabystarmen oralyp keledi.
