Kárim Másimovtiń Astanadaǵy záýlim saraıy Oqý-aǵartý mınıstrligine berildi

ASTANA. KAZINFORM — Ulttyq qaýipsizdik komıtetiniń burynǵy tóraǵasy Kárim Másimovke tıesili elordadaǵy záýlim úı Oqý-aǵartý mınıstrliginiń paıdalanýyna berildi. 

Bul aqparatty Kazinform tilshisine Qaıtarylǵan aktıvterdi basqarý kompanııasynyń baspasóz qyzmeti rastady.

— Qarjy mınıstrliginiń Memlekettik múlik jáne jekeshelendirý komıtetiniń buıryǵyna sáıkes, atalǵan turǵyn úı resmı túrde Oqý-aǵartý mınıstrliginiń «Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵy memlekettik mekemesiniń qaramaǵyna bekitildi, — degen habar aldyq qaıtarylǵan aktıvterdi basqarý kompanııasynan.

Oqý-aǵartý mınıstrliginiń habarlaýynsha, erekshe qajettiligi bar balalarǵa bilim berý boıynsha suranystyń artýyna baılanysty arnaıy jáne ınklıýzıvti bilim berý uıymdarynyń jelisin keńeıtý týraly sheshim qabyldanǵan. 

— Negizgi ortalyq Almaty qalasynda ornalasqan «Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynda» shoǵyrlanady, al basqa óńirlerde, sonyń ishinde Astanada da fılıaly ashylady. Mundaı tásil biryńǵaı ǵylymı-ádistemelik bazany qamtamasyz etedi, mamandarǵa, ata-ana men balalarǵa qolaıly jaǵdaı jasaıdy, sondaı-aq arnaıy bilim berý uıymdarynyń jumysyn tıimdi etýge múmkindik beredi, — deıdi mınıstrliktiń resmı ókili Mereke Amangeldiqyzy.

Aıta ketsek, bıyl 10 aqpanda Kárim Másimovtiń Astanadaǵy záýlim saraıy 1,8 mlrd teńgege satylymǵa shyǵarylǵan edi. 

Alaıda 25 aqpanda ótken aýktsıonda Kárim Másimovtiń záýlim saraıyn eshkim satyp almady. 

Naýryz aıynda Kárim Másimovtiń záýlim saraıy qaıta satylymǵa qoıyldy. 

Eske sala keteıik, Ulttyq qaýipsizdik komıtetiniń burynǵy tóraǵasy Kárim Másimov 2022 jyly 8 qańtarda ustaldy. 

Ulttyq qaýipsizdik komıteti taratqan málimet boıynsha, Másimovtiń premer-mınıstr laýazymynda bolýy kezeńinde bıznes-qurylymnyń birinen astanada quny 2,5 mlrd teńge elıtalyq turǵyn úı men jer telimin alý faktisi boıynsha tergeý júrgizildi.