Kárim Másimov isi Joǵarǵy sotqa jetti me
ASTANA. KAZINFORM — Joǵarǵy sotqa Ulttyq qaýipsizdik komıtetiniń burynǵy tóraǵasy Kárim Másimovtiń isi kassatsııalyq tártippen túspedi jáne óndiriste joq. Bul jaıynda atalǵan vedomstvonyń Kazinform agenttiginiń resmı saýalyna bergen jaýabynda aıtylǵan.
Esterińizge sala ketsek, 2022 jyldyń qańtarynda K.Másimovtiń ústinen memleketke opasyzdyq jasaý faktisimen sotqa deıingi tergeý bastalǵany málim boldy.
Ol Ulttyq qaýipsizdik komıtetiniń tóraǵasy laýazymynan 6 qańtarda bosatylyp, 8 qańtar kúngi tutqynǵa alyndy jáne tergeý ızolıatoryna qamaldy.
Kárim Másimovke qańtar oqıǵasy boıynsha aıyp taǵylǵan bolatyn. Bas prokýror Berik Asylov atap ótkendeı, tártipsizdik kezinde Másimovtiń tapsyrmasy boıynsha UQK departamentteriniń jeke quramy jumys ornyn tastap ketken.
2022 jyldyń tamyz aıynyń sońynda UQK-nyń burynǵy basshysy men onyń orynbasarlary memlekettik opasyzdyq jasaýǵa, bılikti kúshpen basym alýǵa tyrysýǵa, bılik pen laýazymdyq ókilettikti asyra paıdalanýǵa kináli dep tanyldy.
Al Másimovtiń isi «asa qupııa» belgisimen ótti.
Kárim Másimovtiń múlkin tárkilep, memlekettik qyzmette laýazym atqarý quqynan ómir boıyna aıyrý arqyly 18 jylǵa sottaldy. Ol úkimge shaǵym túsirdi.
2023 jyldyń maýsymynda astanalyq sot úkimniń tutqyndy qamaýda ustaý bóligin ǵana jumsartty.
2023 jyldyń qarashasynda Ulttyq qaýipsizdik komıteti Kazinform agenttigine K.Másimovke qatysty QK 218-baby «Qylmystyq jolmen alynǵan aqshany jáne ózge múlikti zańdastyrý (jylystatý)» jáne 366-baby «Asa iri kólemde para alý» boıynsha sotqa deıingi tergeý júrip jatqanyn habarlaǵan edi. Sol sebepti qylmystyq is aıasynda tergeý amaldaryn júrgizý maqsatynda Astana qalasy UQK tergeý ızolıatorynda otyr.
