«Qarlyǵash uıa salǵanda» telehıkaıasynyń ekinshi bólimi efırge shyǵady
NUR-SULTAN. QazAqparat - «Habar» telearnasynan búginnen bastap «Qarlyǵash uıa salǵanda» telehıkaıasynyń ekinshi maýsymy jalǵasyn tabady, dep habarlaıdy QazAqparat.
Ótken jyly kórermenniń kózaıymyna aınalǵan jobanyń avtory, ári prodıýseri – Gúlnur Mamasarıpova. Basty rólderdi Erkebulan Daıyrov pen Kámshat Joldybaeva somdaıdy. Týyndynyń birinshi maýsymy - bas keıipkerlerdiń kóńil jarastyryp, baqytqa kenelýlerimen aıaqtalǵany kópshilik kórermenniń esinde. Alaıda ekinshi maýsymynyń stsenarıı jelisi - ómir buralańdary taqyryby tóńireginde órbıdi.
Telehıkaıada otaý tigip, otbasyn qurýǵa bel býǵan Tasqyn men Qarlyǵash búgingi qoǵamnyń bet-beınesin qaz qalpynda kóz aldyńyzǵa alyp keledi. Sebebi, búginde, sezim syryn sezinip, mahabbatpen bas qosqan kóptegen jas erli-zaıyptylar – ómir ótkelindegi túrli tartysqa toıtarys bere almaı, sergeldeńge salynyp jatqany jasyryn emes. Dál osy syndy búgingi qoǵamnyń ózekti máseleleri - atalmysh melodramaǵa arqaý bolady.
Otbasylyq ómirge ekinshi ret qadam basar aldynda Tasqyn - ótken ómirine oralyp, baqılyq bolǵan jarynyń ata-anasynyń aldynan ótedi. Kóp uzamaı eki jastyń úılený toılary da ótedi. Sol sátte Tasqyn da, Qarlyǵash ta, Tasqynnyń qyzdary da baqytty edi. Biraq, bul baqytty sát – ári qaraı uzaǵynan jalǵasyn tappaıdy. Balqyp-shalqyǵan turmystyq jaǵdaıda ómir súrýge ábden daǵdylanǵan Qarlyǵash – Tasqynnyń qarapaıym úıine kelip, tarshylyqtyń tonyn kıgendeı kúı keshedi. Tipti jas jubaılar kúndelikti kúıbiń tirshilikte bir-birimen kelise almaı qalatyn keleńsizdikterge jıi tap bola bastaıdy. Úılený - ońaı, úı bolý - qıynnyń kebin kıgen Tasqynnyń da, Qarlyǵashtyń da jumystarynda da qıyndyqtar bastalady. Tas pen taýǵa bas urardaı bul kezeńdi bas keıipkerler birge ótkere ala ma? Jumysy dese qashan da janyn beretin Qarlyǵash - ómirinde ótkeni bar Tasqynmen qurǵan shańyraǵyn shaıqaltýy múmkin be? Ózi tańdaǵan taǵdyryna moıynsunǵan Tasqyn tańdaýyna qarsy tura alady ma?
San túrli sezimge bóleıtin «Qarlyǵash uıa salǵanda 2» telehıkaıasy 21.40-ta kórsetiledi.
Romantıkalyq dramada basty rólderdi Kámshat Joldybaeva, Erkebulan Daıyrovtan bólek, Mereı Maqajan, Alaý Qaıratqyzy, Arýjan Qambar, Tynyshkúl Sultanberdıeva, Jolaman Ámirov, Ádına Bajan, Asqar Jumabek jáne t.b.akterlar somdaıdy.
