Qarlyǵash Táshimova: Ar aldynda taza bolý úshin qıyndyqtar men kedergilerge shydaý kerek
KÓKShETAÝ. QazAqparat - Ar-ojdannyń aldynda taza bolý — qıyndyqtar men kedergilerge shydaý. Bul – aqmolalyq polıtsııa maıory Qarlyǵash Táshimovanyń ómirlik ustanymy. Ol eńbekke degen qulshynysy men tabandylyǵynyń arqasynda bıik belesterge qol jetkizip otyr.
Búginde Qarlyǵash Aqmola oblystyq PD zańsyz kóshi-qonmen kúresý jónindegi arnaıy jeke vzvodynyń ınspektory qyzmetin atqaryp júr. Óz isine sheber jannyń jetken jetistigi men alǵan asýy ózinen keıingi jastarǵa úlgi bolardaı. 2007 jyly B.Momyshuly atyndaǵy ІІM Shymkent zań kolledjin, keıin 2011 jyly QR ІІM Almaty Akademııasyn úzdik támamdaǵan ol eńbek jolyn Pavlodar oblysy Baıanaýyl aýdanynda bastapty. Sodan beri 20 jylǵa jýyq bir salada tapjylmastan istegen eńbeginiń arqasynda ol quqyq qorǵaý salasynda mol tájirıbe jınaqtaǵan. Sol sebepti ujymda da syıly. Iyq tirestirip birge qyzmet istep júrgen áriptesteri men qurbylary Qarlyǵash Táshimovany «bilikti tártip saqshysy ári óz isiniń maıtalman mamany» deıdi.
«Súıikti isińniń tereńine boılaǵan saıyn qyzyǵy da, shyjyǵy da molaıa túsedi. Bul kyzmetke eń basty keregi - tózim, saýattylyq. Shydamdylyqqa úıretedi. Jaýapty jumys bolǵandyqtan, basshylardyń bergen tapsyrmalaryn sapaly ári ýaqtyly oryndaýǵa tyrysamyn. Áriptesterimnen da osyny talap etemin. Bul meniń jaýapkershiligimniń belgisi», - deıdi Qarlyǵash Táshimova.
Boıynda týa bitken osyndaı asyl qassıetteriniń arqasynda ol quqyq qorǵaý organdary qyzmetkerleriniń arasynda uıymdastyrylǵan túrli baıqaýlarǵa qatysyp, zor marapattarǵa bólenip keledi.
Máselen, 2008 jyly ІІM qyzmetkerleri arasynda ótken baıqaýda 3-oryn, 2011 jyly kórkemónerpazdardyń respýblıkalyq «Jan júregim - Qazaqstan» atty patrıottyq ánder baıqaýynda 2-oryn alýy, 2013-2014 jyldary «Parasatty polıtseı» respýblıkalyq saıysynda toptyq óner kórsetý boıynsha dıplomant atanýy, sondaı-aq, 2014 jyly Máskeý qalasynda «Eýrazııa» telekanaly ótkizgen «Lýchshıı gorod KZ», 2013-2015 jyldar aralyǵynda «Eki juldyz» baǵdarlamasyna qatysyp, SQO PD mádenıet ortalyǵyndaǵy vokaldyq toppen «El júregi-Astana» atty patrıottyq án baıqaýynda júldeli 1 jáne 2 oryndardan kórinýi Qarlyǵashtyń qanshalyqty jan-jaqty adam ekenin kórsetedi.
Ol, sondaı-aq, ózinen aqyl-keńes surap kelgen jastar men muqtaj jandarǵa kómek qolyn sozýdan jalyqqan emes. Ózi sııaqty názik jandylar onyń qıyndyqtarǵa moıymaıtyn qasıetin, eńbekke degen qulshynysyn úlgi tutýda. Qazirgi kezde ol qyzmet istep júrgen Aqmola oblystyq PD zańsyz kóshi-qonmen kúresý jónindegi arnaıy jeke vzvody óńirde kóshi-qon máselesine qatysty zańdylyqtyń saqtalýyn qadaǵalaý, qylmystyń aldyn alý baǵytynda jumys isteıdi. Sondyqtan oǵan tártip saqshysy retinde úlken jaýapkershilik júktelip otyr.
Áıel - ana, shańyraqtyń uıytqysy desek, búgingi tańda Qarlyǵash Táshimova otaǵasy men balalarynyń da babyn taýyp, qyzmetiniń de berekesin keltirip júrgen jaıy bar.
«2008 jyly Azamat Qabıevpen jumys barysynda tanysyp, otbasyn quryp, bir áýlettiń otyn jaqtym. Búginde jubaıym ekeýimiz Temirlan jáne Tomırıs esimdi eki balany tárbıelep otyrmyz. Ómirlik serigim Azamat ta Aqmola oblysy PD patýrldik polıtsııa batalony vzvodynyń komandıri, otbasymnyń qamqory men tiregi», - deıdi keıipkerimiz.
Dana halqymyz «áıel - aq besiktiń ıesi, týǵan jerdiń kıesi» dep beker aıtpasa kerek. Oǵan Qarlyǵash Táshimovanyń quqyq qorǵaý salasynyń damýyna qosyp otyrǵan úlesi men otbasylyq ómiri aıqyn dálel.
