Qarly borannyń saldarynan Almaty-Tashkent tas jolyndaǵy «Qordaı» asýynda qozǵalys shekteldi - TJM
ASTANA. Qańtardyń 20-sy. QazAqparat - Jambyl oblysynda qarly borannyń saldarynan avtojoldardyń jabylýy sebepti 150 avtokólik Alǵa aýyly men «Otar» baqylaý beketinde tur.
QR Tótenshe jaǵdaılar mınıstrliginiń habarlaýynsha, qańtardyń 19-y kúni saǵat 13.30-da respýblıkalyq mańyzdaǵy Almaty-Tashkent avtojolynyń «Qordaı» asýy aýmaǵyndaǵy ýchaskede qar qursaýynda eki jeńil avtokólik qalyp qoıǵan. Taǵy 150 kólik borannyń saldarynan Alǵa aýyly men «Otar» baqylaý beketinde turaqtaýǵa májbúr. Adamdarǵa jylyný jáne tamaqtaný oryndary uıymdastyryldy.
Qazirgi ýaqytta atalmysh aýmaqty qardan tazartý jumystary júrgizilýde.
Aýa raıynyń qolaısyzdyǵyna baılanysty, qańtardyń 19-y kúni saǵat 22.00-de respýblıkalyq mańyzdaǵy Almaty-Tashkent tas jolyndaǵy «Qordaı» asýynda avtokólik qozǵalystaryna tyıym salyndy.
