Qarly boranda baqtashy joǵalyp ketken - ShQO
ÓSKEMEN. QazAqparat – Shyǵys Qazaqstan oblysy Jarma aýdanynda qarly boran saldarynan baqtashy joǵalyp ketken, dep habarlaıdy QazAqparat.
ShQO TJD baspasóz qyzmetiniń málimetine súıensek, qutqarýshylarǵa habarlasqan Jarma aýdanynyń turǵyndary malǵa ketken baqtashynyń sol kúıi qaıtyp oralmaǵanyn aıtqan.
Birden Semeı qalasynyń jedel-qutqarý jasaǵynyń qyzmetkerleri, jergilikti atqarýshy organnyń mamandary, polıtsııa qyzmetkerleri jáne aýyl halqy ony izdeýge kóshedi. Nátıjesinde tańǵy saǵat 4.30-da iri qara mal, al 9.50-de baqtashynyń ózi tabyldy.
«Budan bólek, qutqarýshylardan eki ýchaskede jolda qalǵan júrgizýshiler kómek suraǵan. Onyń biri Kókpekti aýdanynyń ortalyǵynan 30 shaqyrym jerde ornalasqan Baıbýra ýchaskesinde qar qursaýynda qalypty. Olar KÝNG avtokóligimen sonda baryp synǵan kólikti jóndeýge kómektesip, aýylǵa jetkizip tastaǵan. Al ekinshi oqıǵa respýblıkalyq mańyzy bar «Semeı-Qaınar» tasjolynyń 37 shaqyrymynda oryn aldy. №11 órt sóndirý bólimshesiniń qyzmetkerleri úsh adamdy qaýipsiz jerge kóshirip, kólikti Semeı qalasyna jetkizgen», - delingen vedomstvo málimetinde.
Esterińizge sala keteıik, Shyǵys Qazaqstan oblysynda 19 aqpanda qar tolassyz jaýǵan bolatyn. Qutqarýshylar turǵyndarǵa eldi mekenderden shyqpaýǵa keńes berdi. Respýblıkalyq jáne oblystyq mańyzy bar joldar jabyldy. Naqty aıtqanda, barlyǵy 16 jol ýchaskelerindegi kólik qozǵalysy jabylyp, shektelgen.
