Qarly boran: elordada ǵımarat bólshekteri qulap, elektr jelilerinde apat boldy
ASTANA. QazAqparat – Elordalyq qutqarýshylar kesheden beri 3 myńnan astam qońyraý qabyldady, dep habarlaıdy QazAqparat.
112 jelisine 14 sáýir saǵat 14:00-den bastap ártúrli sıpattaǵy 3 myńnan astam qońyraý tústi. Astana qalasy TJD bólimsheleri jeldiń qatty bolýynan metall konstrýktsııalardyń, qaptaý plıtalarynyń, profparaqtardyń qulaýy, elektr symdarynyń tuıyqtalýy saldarynan 10-nan astam shaqyrtýǵa shyqty.
Qazirgi ýaqytta joldyń nashar kórinýine, qatty jel men boranǵa, kóktaıǵaqqa baılanysty 6 baǵyt boıynsha kólik quraldarynyń barlyq túrleri úshin respýblıkalyq mańyzy bar avtojoldardaǵy qozǵalys jabyq. Astana - Qostanaı tas joly Qajymuqan kentine deıin ǵana ashyq.
Qutqarýshylar elorda turǵyndary men qonaqtaryna qala syrtyna shyǵýdan bas tartý, saq bolý, aýa raıynyń ózgerýi jáne engizilgen shekteýler týraly aqparatty qadaǵalaýdy usynady.
Jel kúsheıgen kezde ǵımarattardan shyqpaı, úı-jaılarda bolýdy eskertedi. Balalardy erekshe baqylaýǵa alý jáne olardy qaraýsyz qaldyrmaýdy qaperge beredi.
«Eger qatty jel kezinde kóshede bolsańyz, jer asty ótkelderinde nemese ǵımarattardyń kireberisterinde panalaýdy usynamyz, tirekterden, aǵashtardan, bılbordtardan, elektr jelileriniń tirekterinen jáne symdardan aýlaq bolýǵa tyrysyńyz.
- jeke avtokólikti aǵashtar men tozyǵy jetken ǵımarattardan qashyq qoıý qajet;
- terezelerdi, esikterdi, murjalardy jáne jeldetkishterdi myqtap jabyńyz;
- qurylys obektileri halyqty jáne aýmaqty qolaısyz aýa raıynyń áserinen qorǵaý jóninde qosymsha sharalar qabyldasyn», - delingen habarlamada.
Aıta ketsek, «Qazgıdromettiń» málimetinshe, 15 sáýirde Astanada qar, syrǵyma boran, kóktaıǵaq boljanady. Ońtústik-batystan soltústik-shyǵysqa aýysatyn jel ekpini 23 m/s jetedi. Aýa temperatýrasy túnde jáne kúndiz 5-7 gradýsqa deıin kúrt tómendeýi múmkin.