Karlsen shahmattan onlaın-sýpertýrnıriniń jeńimpazy atandy
NUR-SULTAN. QazAqparat – Álem chempıony norvegııalyq Magnýs Karlsen Magnus Carlsen Invitational sýpertýrnıriniń fınalynda amerıkalyq Hıkarý Nakamýrany jeńdi. Týrnır Chess24 saıtynda onlaın rejıminde ótti, dep habarlaıdy QazAqparat.
Tórt partııa qorytyndysy boıynsha norvegııalyq shahmatshy 2,5:1,5 esebimen jeńiske jetti.
Jarysqa segiz shahmatshy qatysty. Jartylaı fınalda 32 jastaǵy amerıkandyq óziniń otandasy Fabıano Karýanýdan basym tústi, al 29 jastaǵy norvegııalyq shahmatshy qytaılyq Dın Lıjendi jeńgen bolatyn. Týrnırdiń júldelik qory 250 myń dollardy quraıdy, jeńimpaz 70 myń dollardy enshileıdi.
Karlsen – shahmattan 16-shy álem chempıony, tarıhta birinshi absolıýtti álem chempıony (úsh sanatta: klassıkalyq shahmat, rapıt jáne blıts boıynsha jeńimpaz).
Ol nebári 19-ynda Halyqaralyq shahmat federatsııasy (FIDE) reıtınginiń birinshi ornyn ıelengen eń jas shahmatshy.
Nakamýra AQSh-tyń bes dúrkin chempıony. 15 jasynda FIDE halyqaralyq grossmeısteri ataǵyna ıe bolyp, budan buryn Robert Fısher ornatqan amerıkalyq shahmatshylar arasyndaǵy rekordty jańartqan.
