Karlos Alkaras barlyq «Úlken dýlyǵa» týrnırin utqan eń jas tennısshi atandy

ASTANA. KAZINFORM – Melbýrn qalasynda tennısten Aýstralııa ashyq chempıonaty máresine jetti.

Erler arasynda fınalda «Úlken dýlyǵa» týrnıriniń 24 dúrkin chempıony, serbııalyq Novak Djokovıch pen osyndaı alty jarysta úzdik atanǵan ıspanııalyq Karlos Alkaras bas júldeni sarapqa saldy.

Fınal bastalmaı turyp-aq birinshilikte tarıhı nátıje tirkeldi. Novak 38 jasta bolsa, Karlos 22-de edi. Olardyń jas aıyrmashylyǵy 15 jas 349 kún edi. Mundaı jas aıyrmashylyǵymen buryn sońǵy básekede tennısshiler oınap kórmegen bolatyn.

Sonymen qatar Alkaras jeńiske jetse, ol barlyq tórt «Úlken dýlyǵa» týrnırinde chempıon atanǵan eń jas tennısshi atanatyn edi. Al Djokovıch utqan jaǵdaıda ol 25 dúrkin jeńimpaz bolyp, rekord ornatýshy edi. Tennıs tarıhynda N.Djokovıch «Úlken dýlyǵa» týrnıriniń 24 dúrkin jeńimpazy Margaret Kortty áldeqashan qýyp jetken.

Fınalda Karlos Alkaras óziniń álemniń 1-raketkasy ekendigin dáleldep, N.Djokovıchti 2:6, 6:2, 6:3, 7:5 esebimen tize búktirdi. Osylaısha, ol Aýstralııa chempıonatynda alǵash ret top jardy. Bul – Alkarastyń «Úlken dýlyǵa» dodalaryndaǵy jetinshi tıtýly.

Eske sala keteıik, budan buryn Elena Rybakınanyń Aýstralııa ashyq chempıonatynyń jeńimpazy atanǵanyn jazǵan edik.

Memleket basshysy Elena Rybakınany jeńisimen quttyqtady.

Elena Rybakına Qazaqstan halqyna alǵysyn aıtty.