Karlos Adames Jánibek Álimhanulymen jekpe-jek ótkizgisi keledi
ASTANA. KAZINFORM — Domınıkanalyq boksshy, orta salmaqtaǵy WBC tujyrymy boıynsha álem chempıony Karlos Adames qazaqstandyq Jánibek Álimhanulymen biriktirýshi jekpe-jek ótkizgisi keletinin qaıta málimdedi. Jánibek – orta salmaqta WBO nusqasy boıynsha álem chempıony.
Álimhanuly men Adames arasyndaǵy yqtımal kezdesý týraly 2023 jyldan beri aıtylyp keledi. Eki boksshy birin-biri áleýmettik jeliler arqyly jekpe-jekke shaqyryp júrgenimen, naqty kelisimge kelgen sátte kelissózder toqtap qalyp otyrǵan. Bul aralyqta olar bir-birin kelisimshartqa qol qoıýdan bas tartyp, qorqaqtyq tanytyp júr dep aıyptaǵan.
2026 jyldyń sáýirinde Karlos Adames qaıtadan ashyq málimdeme jasap, Jánibek Álimhanulyn jekpe-jekke shaqyrdy. Onyń aıtýynsha, bul aıqas onyń mansaby úshin erekshe mańyzǵa ıe.
— Bul jekpe-jek men úshin óte jeke másele. Ol maǵan rıngten tys zııan keltiremin dep aıtqan. Men onyń muny sózben emes, rıngte dáleldegenin qalaımyn. Ol kamera aldynda nemese mıkrofon arqyly emes, naqty qalaı áreket etetinin kórsetsin. Men ózimdi odan myqty boksshymyn dep esepteımin. Sondyqtan onyń bárin rıngte dáleldeýi kerek, — dedi Adames Inside The Ring YouTube arnasyna bergen suhbatynda.
Ol sondaı-aq jekpe-jekke kez kelgen ýaqytta daıyn ekenin jáne Álimhanulymen kezdesý ótkizýge asyǵatynyn aıtty.
Aıta keteıik, Jánibek Álimhanuly 2026 jyldyń jeltoqsanyna deıin dıskvalıfıkatsııada. Buǵan onyń dopıng synamasynan tyıym salynǵan zat tabylýy sebep bolǵan. Qazirgi ýaqytta WBO boksshynyń dıskvalıfıkatsııasyn qysqartý nemese alyp tastaý týraly apellıatsııasyn qarastyryp jatyr.
Sonymen qatar, Karlos Adamespen jekpe-jekke resmı túrde taǵy bir qazaqstandyq boksshy — Meıirim Nursultanov ta úmitker retinde qarastyrylyp otyr.
Buǵan deıin qazaqstandyq boksshy Jánibek Álimhanuly dopıng isi boıynsha taǵaıyndalǵan dıskvalıfıkatsııadan qutylý úshin jańa qadam jasaǵanyn jazdyq.
