Qarlyǵash Jamanqulova: Konstıtýtsııalyq reforma sóz bostandyǵyn nyǵaıtady
ASTANA. KAZINFORM – Jańa redaktsııadaǵy Konstıtýtsııa sóz bostandyǵyna kepildik berip, tsenzýraǵa tikeleı tyıym salýdy naqty bekitedi. Bul týraly «Ádil sóz» sóz bostandyǵyn qorǵaý halyqaralyq qorynyń prezıdenti Qarlyǵash Jamanqulova málimdedi.
Sarapshynyń aıtýynsha, búginde qoǵamda sóz bostandyǵy taqyrybyna degen qyzyǵýshylyq aıqyn baıqalady.
– Men úshin, sóz bostandyǵyn qorǵaýdy basty maqsat etken uıymnyń basshysy retinde, bul – qýantarlyq jaǵdaı. Alaıda sonymen birge qoǵamdyq talqylaýlardyń sapasy alańdatady. Atap aıtqanda, pikirtalastardyń basym bóligi naqty derekterge emes, joramaldarǵa negizdelip jatady. Aıta ketý kerek, Konstıtýtsııa jobasynyń túpkilikti mátini ázirge joq. Biz ártúrli nusqalardy talqylap, tujyrymdamalardaǵy ekiushtylyqty boldyrmaý jáne quqyqtyq naqtylyqty qamtamasyz etý úshin óz usynystarymyzdy engizdik. Osy kezeńde bastysy – jańa redaktsııadaǵy Konstıtýtsııada sóz bostandyǵyna kepildik beriledi jáne tsenzýraǵa tikeleı tyıym naqty bekitiledi, - dedi Qarlyǵash Jamanqulova.
Onyń sózinshe, bul normalar qoǵam úshin qaǵıdatty mańyzǵa ıe, óıtkeni olar azamattyq ınstıtýttar men memleket arasyndaǵy senimniń negizin qalyptastyryp, ashyq dıalog standarttaryn belgileıdi ári eldiń demokratııalyq damýyn nyǵaıtady.
– Qoǵamdaǵy alańdaýshylyqtyń bir bóligi qoldanystaǵy Konstıtýtsııanyń 12-babymen baılanysty ekenin túsinemin. Onda bir adamnyń quqyqtary men bostandyqtary ózge adamnyń quqyqtary men bostandyqtary bastalatyn jerde shekteletini aıtylǵan. Alaıda mundaı shekteýler qazirdiń ózinde bar ekenin jáne olardyń Qazaqstannyń halyqaralyq mindettemelerine, sonyń ishinde adam quqyqtarynyń jalpyǵa birdeı deklaratsııasyna tolyq sáıkes keletinin atap ótken jón. Eshbir bostandyq ózge adamdardyń quqyqtary men bostandyqtaryn taný jáne qurmetteý, sondaı-aq demokratııalyq qoǵamdaǵy moral, qoǵamdyq tártip pen jalpy ıgilik talaptaryn qamtamasyz etý maqsatynan tys shektelmeıdi, - dep túsindirdi Qarlyǵash Jamanqulova.
Buǵan deıin Konstıtýtsııaǵa engiziletin túzetýlerde sóz bostandyǵy men beıbit jınalystardy ótkizý quqyǵy saqtalatyny aıtylǵan edi.