Qarlyǵash Jamanqulova: Demokratııalyq ınstıtýttar – Qazaqstannyń qaýipsizdik júıesiniń bir bóligi
ASTANA. KAZINFORM — Qazaqstandaǵy konstıtýtsııalyq ózgeristerdiń negizinde adam quqyqtaryn qorǵaý, memlekettiń azamattar aldyndaǵy jaýapkershiligin arttyrý jáne qoǵamnyń senimin nyǵaıtý qaǵıdattary jatyr. Jańa Konstıtýtsııa memlekettik ınstıtýttar júıesin jańartyp qana qoımaı, azamattardyń quqyqtaryn qorǵaýǵa arnalǵan qosymsha kepildikterdi de bekitti. Bul ózgeristerdiń eldiń turaqty damýy úshin mańyzy týraly Quryltaı depýtaty Qarlyǵash Jamanqulova Varshada ótip jatqan EQYU-nyń Adamı ólshem jónindegi konferentsııasynyń jetinshi sessııasynda aıtty.
Konferentsııaǵa qatysýshylar aldynda sóz sóılegen depýtat adam quqyqtaryn saqtaý, memlekettik organdardyń eseptiligi men qoǵamnyń senimi beıbitshilik pen turaqtylyqty qamtamasyz etýde tikeleı mańyzǵa ıe ekenin atap ótti. Onyń pikirinshe, demokratııalyq ınstıtýttardy damytý Qazaqstannyń ishki damýyna ǵana emes, eldiń egemendigi men ulttyq ornyqtylyǵyn nyǵaıtýǵa da yqpal etedi.
— Ortalyq Azııadaǵy orta derjava sanalatyn Qazaqstan úshin demokratııalyq ınstıtýttar — qaýipsizdik ınfraqurylymymyzdyń bir bóligi, sondaı-aq egemendigimiz ben ornyqtylyǵymyzdyń qaınar kózi, — dedi Qarlyǵash Jamanqulova.
Saıası ózgeristerge toqtalǵan depýtat memlekettik basqarý júıesiniń jańarýyna jáne azamattardyń sheshim qabyldaý úderisine qatysý múmkindikteriniń keńeıýine nazar aýdardy. Jańa konstıtýtsııalyq modelde bir palataly Parlament — Quryltaı mańyzdy oryn alady. Ol zań shyǵarý qyzmetin júzege asyryp, saılaýshylardyń múddesin bildiredi jáne atqarýshy bılikke parlamenttik baqylaý júrgizýge ókiletti.
Qoǵamnyń múddesin bildiretin taǵy bir ınstıtýt — Qazaqstannyń Halyq Keńesi. Zań shyǵarý bastamasy quqyǵyna ıe bul organ mańyzdy máselelerdi qoǵamdyq talqylaýdan ótkizip, olardy keıin zań shyǵarý deńgeıinde qarastyrýǵa múmkindik berýge tıis.
Qarlyǵash Jamanqulova jańa Konstıtýtsııada bekitilgen quqyqtyq kepildikterge de erekshe toqtaldy. Memleketti damytýdyń basym baǵyttary qatarynda bilim, ǵylym jáne ınnovatsııa belgilengen. Sonymen birge Ata zań memlekettik organdardyń zańsyz áreketterinen keltirilgen zııandy ótetý quqyǵyn qarastyrady.
— Bul memlekettik bıliktiń árbir adam aldyndaǵy mindettemeleri bar ekenin aıqyn kórsetedi, — dedi depýtat.
Jamanqulovanyń aıtýynsha, jańa Konstıtýtsııanyń qabyldanýy — aldaǵy jumystyń bastaýy ǵana. Reformalardyń tıimdiligi, eń aldymen, bekitilgen normalardyń is júzinde oryndalýymen, ásirese azamattardyń quqyqtaryn qorǵaý jáne memlekettik ınstıtýttardyń jaýapkershiligin qamtamasyz etý máselelerimen ólshenýge tıis.
— Halyq qabyldaǵan Konstıtýtsııa halyqtyń ıgiligi úshin jumys isteýi kerek. Biz, depýtattar, ásirese Konstıtýtsııalyq reforma jónindegi komıssııanyń quramynda bolǵandar, onyń júzege asyrylýyn qadaǵalap, osy mindettemelerdiń is júzinde oryndalýyn qamtamasyz etýge tıispiz, — dep atap ótti ol.
Sóz sońynda depýtat memleket, halyq jáne ult uǵymdaryn toǵystyratyn «el» túsinigine toqtaldy. Onyń aıtýynsha, bul uǵym ortaq taǵdyr men ár azamattyń el bolashaǵyna degen jaýapkershiligin bildiredi.
Qazaqstannyń basqa Otany joq ekenin aıtqan Prezıdent Qasym-Jomart Toqaevtyń sózin eske salǵan Qarlyǵash Jamanqulova eldiń halyqaralyq yntymaqtastyqty damytýǵa jáne jan-jaqty qaýipsizdikti qamtamasyz etý jolyndaǵy birlesken kúsh-jigerge beıildi ekenin jetkizdi.
