Qarly boran Eýropany turalatyp tastady: júzdegen reıs toqtap, mektepter jabyldy
ASTANA.KAZINFORM — Qatty aıaz ben qalyń qar Eýropanyń birqatar elinde kólik qozǵalysyn aıtarlyqtaı qıyndatyp, bılikti mektepterdi ýaqytsha jabýǵa májbúr etti. Bul týraly Bild basylymy habarlady.
Eń kúrdeli jaǵdaı Nıderlandyda qalyptasty. Aýa raıynyń qolaısyzdyǵy men tehnıkalyq aqaýlar temirjol qatynasyn tolyqtaı toqtatty. Eldiń basty áýejaıy sanalatyn Amsterdamdaǵy Shıphol áýejaıynda shamamen 700 reıs keıinge shegerildi. Bul – josparlanǵan ushyp-qoný reısteriniń jartysynan astamy.
Frantsııada da jaǵdaı kúrdeli. Orlı men Sharl-de-Goll áýejaılarynda reısterdiń 15 paıyzy toqtatyldy. Eldiń avtomagıstraldarynda jalpy uzyndyǵy shamamen 1 myń shaqyrymǵa sozylǵan alyp keptelister paıda boldy. Normandııa aımaǵynda aýa raıyna baılanysty jol-kólik apattary saldarynan keminde bes adam qaza tapty. Qar men aıazǵa baılanysty joǵary jyldamdyqty TGV poıyzdary jyldamdyǵyn saǵatyna 300 shaqyrymnan 200 shaqyrymǵa deıin tómendetýge májbúr boldy. Parıjde avtobýs qozǵalysy ýaqytsha toqtatylyp, keıbir tramvaı jelileri jabyldy.
Polshada poıyzdardyń birneshe saǵatqa keshigýi tirkelse, Shvetsııa men Bosnııa jáne Gertsegovına áýejaılary kóptegen reısti jappaı toqtatýǵa májbúr boldy. Rýmynııanyń Transılvanııa aımaǵyndaǵy Karpat óńirinde qar basqan joldar saldarynan birneshe aýyl syrtqy álemmen baılanyssyz qaldy.
Qarly boran Germanııany da sharpydy. Basylym málimetinshe, joldardaǵy kóktaıǵaq kóptegen jol apatyna sebep bolyp otyr. Túngi aýa temperatýrasy mınýs 24 gradýsqa deıin tómendegen. Aldaǵy kúnderi elde qarly boran, keı jerlerde muzdy jańbyr men ekpindi jel kútiledi. Jeldiń jyldamdyǵy saǵatyna 120 shaqyrymǵa deıin jetýi múmkin. Mamandar 8–9 qańtar kúnderi kólik qozǵalysynda eleýli irkilister bolýy yqtımal ekenin eskertti.
Qolaısyz aýa raıy Ulybrıtanııaǵa da jetti. Birqatar áýejaıda reıster toqtatyldy. El boıynsha júzdegen mektep jabyldy. Tek Soltústik Irlandııanyń ózinde 212 oqý ornynda sabaq ótpeı qaldy. Ulybrıtanııany qurlyqtaǵy Eýropamen baılanystyratyn Eurostar kompanııasy jolaýshylarǵa saparlaryn keıinge qaldyrýdy usyndy. Nıderlandydaǵy aýa raıynyń qolaısyzdyǵyna baılanysty poıyzdar tek Brıýsselge deıin ǵana qatynady.
Tabıǵı apat Ispanııaǵa qarasty Balear araldaryna da jetti. Malorka aralynda qalyptan tys mólsherde qar jaýyp, bılik sary deńgeıdegi qaýip rejımin engizdi.
Eske sala keteıik, birneshe kún buryn Eýropadaǵy eń úlken áýejaıda júzdegen reıs keıinge shegerilip, toqtatylýy múmkin ekeni eskertilgen bolatyn.