Karl Froch: Golovkındi «jeńilmeıtin boksshy» mártebesinen aıyrǵym keledi
ASTANA. QazAqparat - Ekinshi ortasha salmaqtaǵy álemniń burynǵy chempıony, 37 jastaǵy brıtandyq Karl Froch ol WBA (Super) jáne WBC (Interim) nusqasy boıynsha ortasha salmaqtaǵy álem chempıony, 33 jastaǵy qazaqstandyq Gennadıı Golovkınmen aıqasqa shyqsa, ony jeńilýdi bilmeıtin boksshy mártebesinen aıyratynyn aıtty.
Bul týraly Sports.kz. jazady.
«Kimmen bolsa da jekpe-jekke shyǵýǵa ázir ekenimdi talaı aıtqanmyn», - degen Frochtyń sózin keltirdi BoxingScene.com. - Meniń jekpe-jekter tizimimdi kórgender kez kelgen qarsylasqa tótep bere alatynymdy birden baıqaıdy. Men Jan Paskal, Mıkkel Kesslerden bastap, P4P reıtınginde 2-shi orynda turǵan Andre Ýordke deıingi álemniń úzdik boksshylarymen judyryqtastym». «Golovkın be? Men eshkimnen de qoryqpaımyn, - dep sózin jalǵady Froch. - Eger boksta qalatyn bolsam, onymen aıqasqa túsý - armanym. Ony jeńilmeıtin boksshy mártebesinen aıyrǵym keledi. Golovkın - ortasha salmaqta ǵoı, odan kúshtirek ekenime, onyń soqqylaryna tótep bere alatynyma senimdimin. Ol - tańqalarlyq sheberlikpen aıqasatyn erekshe boksshy, kez kelgen ortasha salmaqty boksshy úshin asa qaýipti dep te aıta alamyn. Alaıda onyń ekinshi ortashaǵa kelgende qalaı aıqasatyny jaıly eshkim bilmeıdi».
«Soqqylarymen qarsylasyn jaıpaǵan, bári keremet dep joǵary baǵalaǵan jigitpen jekpe-jekke shyǵý erekshe oqıǵa bolary sózsiz. Odan ne kútesizder? Bile bilseńizder men Artýr Abrahammen judyryqtasqam. Ol ortasha salmaqta barsha qarsylasyn nokaýtqa jibergen boksshy bolatyn. Al men ony raýnd boıynsha 12-0 esebimen uttym. Jurt tań qaldy», - dedi Froch.
