Karl Djenkıns «Astana Opera» teatrynda «Tilep» jáne «May night» («Abaı», «Shákárim») sıýıtalarynyń premerasyn usynady
ASTANA. QazAqparat - 10 mamyrda «Astana Opera» teatrynyń negizgi zalynda Marat Bısenǵalıev basqaratyn Almaty sımfonııalyq orkestriniń oryndaýynda Karl Djenkınstiń «Tilep» jáne « May night» («Abaı», «Shákárim») sıýıtalarynyń tusaýy kesiledi. Tusaýkeser Qazaq handyǵynyń 550 jyldyǵyna oraı uıymdastyrylǵan, dep habarlady «Astana Opera» teatrynyń baspasóz qyzmeti.
Astana qalasynyń turǵyndary men qonaqtary, zamanymyzdyń eń tanymal kompozıtorlarynyń ondyǵyna kiretin ataqty Karl Djenkınstiń biregeı avtorlyq óńdeýindegi qazaq taqyrybyna arnalǵan sıýıtalaryn tyńdaıdy. Avtordyń «Tilep» jáne «May night» («Abaı», «Shákárim») shyǵarmalaryn dúnıege ákelerde olarǵa qyzyǵyp, bilek sybana kiriskeni sonshalyqty, ol tipti, kóshpendilerdiń mýzykalyq mádenıetin jáne qazaqtyń halyq aspaptaryn zertteý maqsatynda, 2005 jyly Qazaqstanǵa arnaıy kelip qaıtqan.
«Astana Opera» teatrynda Karl Djenkıns tyńdarman aldynda dırıjer retinde óner kórsetedi. Keremet mýzykany Marat Bısenǵalıevtiń basshylyǵymen qurylǵan «Almaty sımfonııalyq orkestri» oryndaıdy. Elimizben qatar shet elderde ataǵy shyqqan maestro orkestriniń quramynda Qazaqstannyń myqty mýzykanttary, respýblıkalyq jáne halyqaralyq baıqaýlardyń laýreattary bar. Orkestr qazaq halqynyń mádenı murasyn qazirgi zamanǵa saı mýzykalyq jáne oryndaý óneriniń tilinde búkil álemde laıyqty oryndap júr.
Skrıpkadaǵy solo partııasyn asqan sheber skrıpkashy, álemdik mádenıetke qosqan úlesi úshin altyn dıskilerdiń jáne kóptegen memlekettik syılyqtardyń ıegeri, Carnegie Hall, Lincoln Centre (New York), Wigmore Hall, Barbican Centre, Royal Albert Hall, Royal Festival Hall (London) sııaqty álemdik kontserttik sahnalarda óner kórsetip júrgen Marat Bısenǵalıev oryndaıdy.
Esterińizge sala ketsek, bul kontsert 2014 jylǵy 12 qarashada Nıý-Iork qalasyndaǵy álemniń eń bedeldi Karnegı Holl sahnasynda úlken jetistikpen ótken bolatyn. Áıgili brıtandyq kompozıtor K. Djenkınstiń shyǵarmalarynyń tusaýkeseri Qazaqstannyń mádenı ómirinde úlken ári mańyzdy shara bolmaqshy.
Kontserttiń bas demeýshisi - metsenat Sapar Ysqaqov. Ol - «SONY BMG» kompanııasynyń Altyn dıski ıegeri (Ulybrıtanııa, 2006), ulttyq konkýrs-festıvaldiń laýreaty, ulttyq mádenıetti qoldaýǵa qosqan úlesi úshin 2005, 2006, 2008 jyldardaǵy «Altyn Adam» - «Jyl adamy» ataǵynyń ıegeri. «Koroleva Vıktorııa» (Ulybrıtanııa, Oksford, 2007), «Qurmet» ordenderimen (Qazaqstan) marapattalǵan.
