«Qarqyndy damıtyn qala»: Jańa Konstıtýtsııa aıryqsha aımaqty salyqtan múlde bosatýy múmkin
ASTANA. KAZINFORM — Májilis depýtaty Magerram Magerramov «Referendým-2026» atty onlaın-marafonda jańa Konstıtýtsııa aıryqsha quqyqtyq rejım beretin «Qarqyndy damıtyn qalanyń» mártebesi eldiń aýmaqtyq tutastyǵyna qalaı áser etetinin aıtty.
— Bul belgilengen aýmaqta ekonomıkany ósirýge arnalǵan aıryqsha jaǵdaılar jasalady degen sóz. Ol aýmaqta ınvestıtsııalar, ınfraqurylym shoǵyrlanady. Qarapaıymdap aıtsaq, ınvestorlar men jańashyl bastamalardy tartatyn alań qurylady. Bul bizdiń «noý-haý» emes. Álemde mundaı aýmaqtar burynnan jumys istep jatyr. Mysaly, Qytaıdaǵy balyqshylar aýyly 10 mıllıonnan astam halqy bar iri megapolıske, tehnologııalyq habqa aınaldy. Aıryqsha quqyqtyq rejım salyq boıynsha, jer qatynastary boıynsha, tirkelý boıynsha, ınvestıtsııalyq qyzmet baǵyttarynda jeńildikter beredi. Birden aıtqym keledi, bul búkil eldegi bılik júıesinen erekshe bolǵanymen, oǵan balama retinde qoldanylmaıdy. Belgili bir aýmaqta quqyqtyq vakkým paıda bolady dep túsinbeý kerek. Ol aýmaqta Konstıtýtsııanyń kúshi, sot baqylaýy, prokýrorlyq qadaǵalaý jáne ekologııa standarttary, sybaılas jemqorlyqqa qarsy normalar jumys isteıdi, — dedi depýtat.
Onyń paıymdaýynsha, aıryqsha quqyqtyq rejım «qarqyndy damıtyn qalaǵa» ınvestıtsııa salǵan bıznestiń shyǵynyn azaıtyp, bıýrokratııalyq kedergilerden arashalaıdy, salyq jeńildikterin usynady.
— Tipti salyqtar múldem alynyp tastalýy múmkin. Osynyń arqasynda óńirde kásiporyndar, jumys oryndary ashylyp, qarjylyq bazasy nyǵaıady, — dedi depýtat.
Onyń áriptesi Ashat Rahymjanov aıryqsha quqyqtyq rejım belgilengen aýmaqqa ǵana emes, oǵan irgeles jatqan eldi mekenderge de serpin beretinin aıtady.
— Ondaı qalaǵa aıryqsha mártebe berilgenimen, Qazaqstannan bólip shyǵarylmaıdy. Óıtkeni jańa Konstıtýtsııa jobasynda Qazaqstannyń aýmaǵy bólshektenbeıtini naqty bekitilgen. Bıliktiń naqty sáýleti bar. Qarqyndy damıtyn qalalar týraly aıtqan kezde olarǵa arnalǵan Konstıtýtsııalyq zań qabyldanatyny aıtylǵan. Al ol zań Konstıtýtsııaǵa baǵynyp jazylady, ıaǵnı ol qalanyń damýy memlekettik organdardyń baqylaýynda bolady. Iá, ol aýmaqty basqarýdyń ereksheligi bolady. Biraq ol erekshelik aýmaqty elden bólip áketý nemese basqaratyn ákimdik pen máslıhattarǵa artyq ókilet beriledi degen sóz emes, — dedi depýtat.
Aıta keteıik, Kazinform agenttiginiń YouTube arnasynda «Referendým-2026» atty onlaın-marafonyn tikeleı efırde kórsetip jatyr. Saǵat 12:00–de bastalǵan onlaın-marafon saǵat 18:00–ge deıin jalǵasady dep josparlanǵan.