Qarqaralynyń ulttyq parkindegi órt sóndirildi
NUR-SULTAN. QazAqparat – Qaraǵandy oblystyq Tótenshe jaǵdaılar departamentiniń bastyǵy Ibragım Kúlshimbaev Qarqaraly aýdanynyń Baqty ulttyq parkinde órttiń sóndirilgenin málim etti.
Órt sóndirýshiler ary qaraı byqsyǵan oryndardy tolyq óshirý jumystaryn júrgizip jatyr, dep habarlaıdy QazAqparat tilshisi.
Baqtydaǵy tabıǵı órtti sóndirý jumysy tórtinshi kúnge sozyldy. Jumys táýlik boıy júrgizilýde. Tótenshe jaǵdaıdy joıý aımaǵynda jedel shtab jumysy uıymdastyrylǵan. Órt sóndirý jumysyna basshylyq etýdi Qaraǵandy oblysy TJD bastyǵy Ibragım Kúlshimbaevtyń ózi qolǵa alyp otyr.
Jalpy, tótenshe jaǵdaıdy retke keltirý jumysyna 370 adam men 60 arnaıy tehnıka jumyldyrylǵan. Sý shashatyn úsh tikushaq tilsiz jaýdy aýyzdyqtaýdy áýede jalǵastyrýda.
Qarqaraly memlekettik ulttyq tabıǵı parkiniń naqtylaǵan málimetteri boıynsha, órttiń jalpy aýdany 3700 ga aýmaqty quraıdy. Onyń ishinde orman aýmaǵy – 1900 ga.
Órtti sóndirý jumysy taýly jerde qıyndyq týǵyzyp jatyr. Qabyldanǵan sharalar órttiń qarqyndy túrde taralýyn tejegen.
Biraq osy qıyndyqtarǵa qaramastan, ulttyq parktegi órt sóndirilgen.
«Búgin, 2019 jyldyń 16 tamyzynda Qarqaraly memlekettik ulttyq parkiniń aýmaǵynda bolǵan órt aýyzdyqtaldy. Buǵan tótenshe jaǵdaılar departamentiniń, jergilikti atqarýshy organdardyń, sondaı-aq Qarqaraly memlekettik ulttyq parkiniń kúshi men quraldarynyń, «Buırataý», «Baıanaýyl», «Orman jáne janýarlar dúnıesin qorǵaý jónindegi Kývsk sharýashylyǵy», sondaı-aq «Qazavıaqutqarý» bólimsheleri qyzmetkerlerinen qurylǵan kúshter men quraldar tobynyń arqasynda qol jetkizilip otyr. Áýege tikushaqtar da kóterildi. Jalpy birikken kúsh-jigerdiń arqasynda osy nátıjege jettik. Azdaǵan byqsyǵan oryndar qalyp otyr. Olardy sóndirgennen keıin órttiń tolyq sóndirilgenin jarııalaımyz», - dedi Ibragım Kúlshimbaev.
TJD qyzmetkerleri órtti tolyq sóndirý baǵytynda jumys júrgizbek.
Órttiń naqty qalaı shyqqany áli belgisiz. Ony arnaıy komıssııa anyqtaıdy. Alaıda ormash sharýashylyǵynyń ókilderi órttiń naızaǵaıdan paıda bolǵanyn boljap otyr.
