Qarqaralyny sýmen qamtamasyz etý máselesi sheshimin tabatyn boldy
Qaraǵandy oblysynyń ákimi Jeńis Qasymbek jumys saparymen Qarqaraly aýdanynda boldy.
«Sý tartý qurylysy – mańyzdy ári qajetti joba. Ony qoldaımyz, iske asyrýǵa kirisińizder», – dedi Jeńis Qasymbek.
Qarqaraly aýdanynyń ákimi Eldar Dúısetaevtyń aıtýynsha, joba úsh jylǵa shaqtalǵan. Josparǵa saı qubyrlardy tóseý jumystary 2023 jyly aıaqtalýy tıis.
Sondaı-aq, oblys basshysy T. Áýbákirov kóshesinde jańadan salynǵan tórt kópqabatty turǵyn úıdi aralap kórdi. 3 qabatty jańa úılerdegi páterlerdi kezekte turǵan 72 otbasy alady. Bıyl Qarqaraly aýdanynyń 108 áleýmettik jaǵdaıy tómen otbasy baspanaly bolady.
Jeńis Qasymbekke M. Ádekenov atyndaǵy aýyl sharýashylyq kolledjiniń janyndaǵy jańa jataqhana da kórsetildi. Jumys «Prezıdenttiń bes áleýmettik bastamasy» aıasynda júrgizildi. 100 oryndyq tórt qabatty ǵımaratty salý kezinde stýdentterdiń qajettilikteri eskerildi.
Kolledjde 158 bala oqıdy, olardyń kópshiligi basqa aýyldardan kelip oqıtyndar. Stýdentter eski jataqhanada turady.
Qarqaraly – Qaraǵandy oblysy turǵyndarynyń súıikti demalys orny. Jergilikti týrıstik klasterdi damytý úshin jaǵalaýdy abattandyrý, ekotýrızmdi damytý úshin ýchaskeler bólý josparlanýda.
«Ótken jyly óńirge 16 myńnan astam týrıst kelgen. 2 700 tósek-orynǵa arnalǵan 31 demalys aımaǵy jumys isteıdi. Týrısterdi kóbirek tartý úshin ınfraqurylymdy jaqsartamyz. Jumys jospary bar, týrısterdiń demalysyn jaqsartý úshin barlyq jobalardy birtindep júzege asyratyn bolamyz», – dedi Qarqaraly aýdany ákiminiń orynbasary Dıdar Qabaev.
«Qarqaralyǵa ata-analarymyzben birinshi ret kelip otyrǵan joqpyz. Bizge munda óte unaıdy. Demalys bazasyndaǵy jaǵdaı jaqsy, keremet tabıǵat – taza aýa, sańyraýqulaqtar kóp», – deıdi Qaraǵandy qalasynyń turǵyny Alena Romanenko.
Sapar sońynda óńir basshysy aýdan ákimine birqatar tapsyrmalar berip, Qaraǵandy – Qarqaraly jolynyń jaı-kúıin qozǵady.
«Turǵyndardyń jol týraly shaǵymdary bar. Ol respýblıkalyq mańyzy bar jol. Bul máseleni mınıstrliktiń qaraýyna shyǵaratyn bolamyz», – dep atap ótti Jeńis Qasymbek.
