Qarqaralydaǵy jappaı tóbeles barysynda kisi óltirdi degen kúdikpen er adam ustaldy
QARAǴANDY. 13 qarasha. QazAqparat - Polıtsııa qyzmetkerleri qazan aıynyń sońynda Qaraǵandy oblysyndaǵy Qarqaralyda bolǵan jappaı tóbeles barysynda er adamdy óltirdi degen kúdikti azamatty ustady. Bul týraly oblystyq ІІD-niń baspasóz qyzmetinen habarlaıdy.
«Oblystyq ІІD-niń qylmystyq polıtsııa basqarmasynyń qyzmetkerleri 11 qarasha kúni Qaraǵandydaǵy JOO-nyń birinde oqıtyn Qaraǵaıly kentiniń 21 jastaǵy turǵynyn ustady. Ustalǵan azamattyń Qarqaralydaǵy «Úlken kól» jaǵasynda oryn alǵan tóbeles kezinde 1977 jylǵy er azamatqa pyshaq salǵany anyqtaldy. Er adam sonyń saldarynan mert boldy. Pyshaq tárkilendi», - delinedi oblystyq ІІD-niń baspasóz qyzmetinen kelip túsken habarlamada.
Ustalǵan azamatqa qatysty «qamaýǵa alý» bultartpaý sharasy alyndy. Tergeý amaldary júrgizilýde.
Polıtsııanyń aqparatynsha, oqıǵa ornynda ótkizilgen jedel sharalardyń barysynda dóńgelekteri jarylǵan ÝAZ kóligi men úsh uıaly telefon tabyldy.
Buryn habarlanǵandaı, 28 qazan kúni Qarqaraly qalasynda eki top arasynda tóbeles oryn aldy. Sonyń nátıjesinde jergilikti aýrýhanaǵa 6 adam jetkizildi. Olardyń bireýi, JShS-niń 35 jastaǵy jumysshysy júrek tusyna salynǵan pyshaq jaraqatynan kóz jumdy.
Atalǵan faktilermen QR QK-niń 96 baby (Kisi óltirý) jáne 103 baby (Aýyr dene jaraqattaryn salý) boıynsha qylmystyq ister qozǵaldy.
Tóbeleske qatysýshylardyń arasynda sol kúni demalysta júrgen polıtsııa qyzmetkeri de boldy.
TJ-dan keıin ótkizilgen qyzmettik tergeý nátıjeleri boıynsha Qarqaraly aýdandyq ІІB-niń bastyǵy, onyń orynbasary, ákimshilik polıtsııa bólimi bastyǵynyń orynbasary, patrýldik polıtsııa vzvodynyń komandıri qyzmetterinen bosatyldy. Budan basqa, tóbeleske qatysy bar patrýldik polıtsııa vzvodynyń qyzmetkeri de jumystan shyǵaryldy.
