Qarqaralyda týrızmdi damytýdyń áleýeti joǵary -ákim
QARAǴANDY. QazAqparat - Óz qalalaryndaǵy máseleler jaıly Qarqaraly turǵyndary aıtyp berdi. Bul týraly QazAqparat ákimdiktiń saıtyna silteme jasap habarlaıdy.
Aýdandyq aktıv jınalysynda káriz, sýmen qamtý jáne joldarǵa qatysty suraqtar kóterildi. Kásipkerler týrızmdi damytýda jáne shaǵyn nesıe alýǵa kómektesýdi surady.
«Men barlyqtaryńyzdy aýdanda bar máselelerdi talqylaý úshin jınadym. Bul kezdesý erkin formatta ótsin. Barlyq nıet bildirýshiler suraqtaryn qoıa alady. Munda meniń orynbasarlarym men basqarma basshylary bar, olar naqty jaýaptaryn aıtady», - dedi aımaq basshysy otyrysty ashý barysynda.
Qarqaraly turǵyny Serik Jákeev qala damyp kele jatqanyn aıtty.
«Jyl saıyn turǵyndar sany artyp keledi. Qazirgi tańda Qarqaralyda 1800-ge jýyq otbasy turyp jatyr. Adamdar shalǵaıdaǵy aýyldardan kóship kelip, úılerin salyp jatyr. Jáne de osyǵan baılanysty bizde eki másele týyndap otyr - káriz jáne sýmen qamtý júıeleri. Tabıǵı saıabaqtyń janynda uńǵyma bar. Ol jerden qalanyń 80 % turǵyndary sý alyp otyr. Alaıda qalǵandarynda sýmen qamtýǵa qatysty qıyndyqtar bar. Ázirge bul másele sheshilmeı tur» - dep túsindirdi Serik Jákeev.
«Sýmen qamtý júıesine biz qarajat bóldik, biraq sizder ony meńgere almadyńyzdar. Endi mine, turǵyndar oryndy máseleni kóterip otyr...», - dedi Erlan Qoshanov aýdan ákimi Halel Maqsutovqa.
«2013 jyldan beri biz úsh ret ótinish berdik. Biraq bastapqyda qajetti soma 1,5 mlrd teńgeni quraǵan bolatyn, al qazir ol 2,5 mlrd teńgege deıin kóterilip ketti. Sýmen qamtý úshin JSQ daıyn tur. Biz sý qubyryn Jarly aýyly arqyly tartamyz. Geologııalyq-topografııalyq jumystardy eskere otyryp, aýdandyq bıýdjetten 7,5 mln teńge bólingen. Merdiger anyqtalǵan, jumystar aıaqtalýǵa jaqyn», - dep esep berdi aýdan ákimi.
Erlan Qoshanov sonymen qatar, Energetıka jáne TKSh basqarmasynyń jetekshisi Ulantaı Úsenovke: «Bul máselelerdi barynsha shuǵyl túrde sheshý kerek» dep tapsyrma berdi.
Aýdanda týrızm salasyn damytý áleýetine Erlan Qoshanov erekshe nazar aýdardy. Ol Qarqaraly Qazaqstannyń TOP-50 úzdik týrıstik jerleri reıtıngine engenin eske saldy.
«Úzdik ondyqtar qataryna ený úshin ınfraqurylymdy jaqsartyp, joldardy jóndeý qajet. Týrızm damyǵan soń Qarqaraly aýdanynda ómir jaqsarady. Jýyrdaǵy Joldaýynda Elbasy qazaqstandyqtardyń ál-aýqatyn jaqsartýǵa erekshe nazar aýdarý kerektigin aıtty. Biz barlyǵymyz osy baǵytta jumys isteýimiz kerek»,- dep atap ótti Erlan Qoshanov.
