Qarqaralyda medkadrlar tapshylyǵy máselesi sheshildi
QARAǴANDY. QazAqparat - Qarqaralyda medıtsına qyzmetkerlerine arnalǵan úı tapsyrýǵa daıyndalyp jatyr. Oǵan 27 adam qonystanady. Qurylysshylar sońǵy árleý jumystaryn júrgizip jatyr. Qaraǵandy oblysynyń ákimi Jeńis Qasymbek Qarqaraly aýdanyna jumys sapary barysynda páterlerdi qarap shyqty, dep habarlaıdy QazAqparat tilshisi.
Qalada bir kezderi qaraýsyz qalǵan jataqhana qalpyna keltirildi, ol qazir dárigerlerge arnalǵan jaıly orynǵa aınalmaq. Densaýlyq saqtaý basqarmasynyń basshysy Erjan Nurlybaevtyń aıtýynsha, páterler qazirdiń ózinde bólinip qoıǵan. Qarqaralyǵa jas mamandar aýysty, bul medkadrlarǵa degen qajettilikti jabýǵa múmkindik berdi.
Oblys basshysyn birinshi kezekte dárigerler qandaı jaǵdaıda ómir súretini qyzyqtyrdy. Páterler qajetti turmystyq tehnıkamen jáne jıhazben jabdyqtalǵan - tońazytqysh, plıta, as úı jáne jatyn garnıtýrlary bar.
«Men elordada rezıdentýrada oqydym, biraq jyl saıyn Qarqaralyǵa tájirıbeden ótý úshin kelip otyrdym. Aýrýhana ujymy óte jaqsy, men kóptegen patsıentterdi bilemin. Sondyqtan, olar osynda jumys isteýdi usynǵanda, men birden kelistim. Maǵan páter berildi», - deıdi jas maman Aqtoty Nurpozylova.
Bıyl Qaraǵandy oblysynyń medıtsına qyzmetkerlerine 120 páter beriledi. Kelesi jyly olarǵa 400 qyzmettik páter berý josparlanǵan.
Óńir ákimi sondaı-aq 320 oryndyq jańa DSK jáne ústel tennısi ortalyǵynda boldy. Turǵyn úılerdiń qurylys alańyna bardy. Qalada kezekte turǵandar úshin 72 páterlik tórt úı salynýda. Biraq merdiger úıdi tapsyrý merzimi boıynsha artta qalyp keledi.
«Turǵyndar kópten armandaǵan qonys toıyn asyǵa kútýde. Sizderge aqsha bólindi, al sizder úlgermeı jatyrsyzdar!» - dep Jeńis Qasymbek ashýlandy.
Merdiger jaǵdaıdy jumysshylar jetispeıtindigimen túsindirýge tyrysty.
«Jumystaryńyzdy údetińizder, tabyńyzdar, basqa qalalardan jumyskerlerdi jumyldyryńyzdar! Zańda barlyǵy qarastyrylǵan - sizderge aıyppul sanktsııalaryn qoldanýǵa májbúr bolamyz», - dedi oblys ákimi.
Aımaq basshysy sonymen qatar Egindibulaqta da bolyp qaıtty. Onyń turǵyndary №43 mektep pen mádenıet úıiniń uzaqqa sozylǵan jóndeýine shaǵymdandy.
«Jóndeý merzimi boıynsha shaǵymdar bar», - dedi Jeńis Qasymbek merdigerlerge.
Olar mektep pen mádenıet úıindegi jóndeý jumystary bir aı ishinde aıaqtalady dep sendirdi.
Egindibulaq turǵyndary aýyldan qalaǵa turaqty avtobýs reısiniń joqtyǵyna da shaǵymdandy. Oblys ákimi bul másele eki apta ishinde sheshiletinine ýáde berdi.
Egindibulaqta kelesi jyly qaıta qurý jumystary kútilýde: dene shynyqtyrý-saýyqtyrý kesheniniń qurylysy bastalady, sondaı-aq kóshelerdi jóndeýge jáne jaryqtandyrýǵa shamamen 250 mln teńge bólinedi.
Qaraǵaıly aýylynda da oń ózgerister bar. Onda sanıtarlyq-dárigerlik ambýlatorııanyń qurylysy aıaqtalyp, mektep jóndelýde.
Jumys sapary barysynda Jeńis Qasymbek Qarqaralydan Qaraǵaılyǵa baratyn joldyń jóndeý sapasyn da tekserdi. Kún sýytqanǵa deıin merdiger jóndeý jumystaryn aıaqtap úlgerýi tıis.
«Árıne, Qaraǵandydan Qarqaralyǵa deıingi respýblıkalyq joldyń sapasy ózekti másele bolyp tabylady. Aýdannyń orasan zor týrıstik áleýetin eskere otyryp, Indýstrııa jáne ınfraqurylymdyq damý mınıstrligimen osy joldy jóndeýge qarjylandyrýdy ulǵaıtý múmkindigin pysyqtaıtyn bolamyz. Qarqaraly aýdanyndaǵy joldardy jóndeýge qarjylandyrý ulǵaıtylady», - dep atap ótti Qaraǵandy oblysynyń ákimi.
