Qarqaralyda qysqy týrızmdi damytý qolǵa alyndy

Osyǵan oraı, kásip ashamyn degen azamattarǵa ulttyq tabıǵat parki uzaq jáne qysqa merzimge jalǵa jer berip jatyr. Bastama jaman emes. Alǵashqy ashylǵan shańǵy tebý alańy qazir sátti jumys istep tur. Dýman Beısenaev shańǵydan áýesqoılar arasynda halyqaralyq jarystarǵa qatysyp, talaı márte júldeli bolǵan. Janyna jaqyn kásipti tabys kózine aınaldyrý úshin jýyrda ol Qarqaraly memlekettik ulttyq tabıǵat parkinen 5 jylǵa jalǵa jer alyp, shańǵy bazasyn ashty. Munda týrıster men jergilikti turǵyndar kez kelgen ýaqytta kelip, tynyǵa alady. Al keleshekte jas kásipker bul alańda úlken shańǵy jarystaryn uıymdastyrýdy josparlap otyr.

«Adamdar belsendi kelip jatyr. Qysqy týrızm óte jaqsy. Ásem tabıǵattyń aıasynda shańǵymen júgirý, taýdan syrǵanaý paıdaly. Keleshekte jerdi uzaq merzimge alamyz degen oıymyz bar. Bul bastamasy. Bul jer úlken shańǵy bazasyna aınalady. Shańǵy trassasyna jaryq ótkiziledi», - deıdi kásipker Dýman Beısenaev.

Qarqaraly memlekettik ulttyq tabıǵat parkine qarasty 112 myń gektardan astam jer bolsa, sonyń 21 myń gektary týrıstik maqsatta paıdalanylyp otyr. Osy jyly 25 jer ýchaskesi jalǵa berilgen. Onda salynǵan nysandar sátti jumys istep tur. Mundaǵy ásem tabıǵatty tamashalaý úshin týrıster negizinen jazda kóptep keledi. «Ólkede qysqy týrızmdi damytsa, jyl on eki aı úzbeı jumys isteýge bolady», - deıdi mamandar.

«Kóbine jazǵy mezgilde adam sany kóp bolady. Qysqy mezgilde bizde arnaıy turǵyda týrıstik marshrýt joq, sondyqtan jer paıdalanýshylar jumys isteıdi. Shamamen aıtyp keteıin, bıylǵy jyly bizde 35 myń adam baqylaý pýnkterinde tirkelgen. Sonyń 10 myńdaıy osy qysqy merzimde kelgen týrıster. Shetelden de qonaqtar bolyp jatady», - dep atap ótti Qarqaraly memlekettik ulttyq tabıǵat parkiniń mamany Nazgúl Jumasheva.

Taýly aımaqqa tynyǵyp kelýshiler úshin zamanaýı demalys oryndary da jetkilikti. Qazirdiń ózinde 27 nysan jumys istep tur. Al bıyl taǵy 2 týrıstik keshen salynǵan.

Illıýstratsııalyq foto