Qarqaralyda quqyqbuzýshyny atyp óltirgen polıtseıge qatysty sotqa deıingi tergeý amaldary júrgizilip jatyr
QARAǴANDY. QazAqparat - Qaraǵandy oblysy Qarqaralyda quqyq buzýshyny atyp óltirgen polıtseı «qyzmet babyn asyra paıdalandy» dep kúdiktelýde. Bul týraly oblystyq prokýratýradan habarlady.
«Qarqaralyda polıtsııa qyzmetkeriniń tabeldik qarýyn paıdalaný faktisi boıynsha QR QK-niń 262-baby 4-bólimi 2-tarmaǵyna sáıkes sotqa deıingi tergeý amaldary bastaldy», - dep habarlady Qaraǵandy oblystyq prokýratýrasy basqarmasynyń basshysy Almas Ábdaqasov.
Eske sala eteıik, Qarqaralyda polıtseıdiń tabeldik qarýdy paıdalanýy saldarynan 28 jastaǵy er adam qaza tapty. Oqıǵa 24 sáýirde tańǵy saǵat tórtterde «Tamasha» meıramhanasynyń mańynda oryn aldy.
«Qarqaraly aýdandyq ІІB jol-patrýldik polıtsııasy vzvody óz qyzmetin atqarý barysynda arnaıy kólikti mas bes adam toqtatyp, polıtseılerdi balaǵattap, kúsh qoldanýǵa deıin barǵan. Olar polıtseılerdiń buzaqylyqty toqtatý týraly zańdy talabyna baǵynbaǵan. Zańǵa qaıshy árekettiń jolyn kesý maqsatynda polıtsııa qyzmetkerleri aspanǵa, sosyn jerge oq atyp eskertý jasaǵan. Aldyn ala aqparat boıynsha, jerge atylǵan oq yrshyp ketip oqıǵa ornyndaǵylardyń birin jaralaǵan», - dep túsindirdi mán-jaıdy ІІD baspasóz qyzmetiniń basshysy Baqytjan Qudııarov.
Ustalǵan quqyq buzýshylar polıtsııa bólimine jetkizilgen. Olarǵa qatysty QR QK-niń 380-baby 1-bólimi boıynsha sotqa deıingi tergeý amaldary júrgizilýde.
Jaralanǵan er adam aýrýhanada qaıtys bolǵan.
«Prokýratýra qyzmetkerleri qarý qoldanýdyń negizdiligin tekserýde. ІІD Ózindik qaýipsizdik basqarmasy qyzmettik tergeý júrgizip jatyr», - dep habarlaıdy oblystyq ІІD-niń baspasóz qyzmeti.
