Qarqaralyda kópjyldyq sý máselesi sheshilmek
B ıyl negizgi jumystar júrgiziledi, al kelesi jyly nysan tapsyrylýy tıis.
Ótken jyly jer asty sýy shoǵyrlanǵan orynda tórt uńǵyma burǵylandy. Qarqaraly aýdanynyń ákimi Eldar Dúısetaev bıyl jumystardyń negizgi bóligi atqarylatynyn habarlady. Sorǵy stantsııalaryn salý, rezervýarlardy toltyrý jáne qubyrlar salý josparlanýda. Sý taratqyshtyń uzyndyǵy 40 shaqyrymdy quraıdy, joba respýblıkalyq bıýdjetten qarjylandyrylady.
Jeńis Qasymbek aýdanǵa is sapary barysynda jumystardyń sapasyn baqylaýdy tapsyrdy. Ol Qarqaraly tabıǵaty qurylysshylardyń aralasýynan zardap shekpeýi tıis ekenin atap ótti.
«Joba óte mańyzdy. Turǵyndar ony kútip otyr. Kelesi jyly tolyq aıaqtaý kerek», – dep atap ótti Jeńis Qasymbek.
Aýdannyń basqa eldi mekenderiniń turǵyndary da sapaly aýyz sýmen qamtamasyz etiledi.
Jeńis Qasymbek Qarqaralyda halyqpen esep berý kezdesýin ótkizdi. Qarqaraly turǵyndary turǵyn úı-kommýnaldyq saladaǵy problemalar, mektepter men aýyldyq klýbtardy jóndeý, joldardyń jaǵdaıy, jaıylymdardyń jetispeýshiligi jáne t. b. týraly aıtty.
Egindibulaq turǵyndary burynnan beri Shyǵys Qazaqstanǵa qaraı jaqsy jol jasaýdy ótingen bolatyn. Kópten kútken joba bıyl bastalady. Egindibulaq – Aqtasty – Aıryq tasjolyna asfalt tóseledi.
Sonymen qatar, Tegisshildik – Kóktas, Qarqaraly – Qaraǵaıly joldaryn, Mamraev – Qoıandy, Qarabulaq aýyldarynyń kireberisterin jóndeý josparlanǵan.
Qarqaralyda turǵyn úı máselesi de sheshiletin bolady. Bıyl kezekte turǵandar úshin 36 páterli eki kópqabatty úı salynady.
Áleýmettik nysandarǵa keler bolsaq, Qarqaralydaǵy Mádı Bapıuly atyndaǵy mektep kúrdeli jóndeýden jáne Terekti aýylyndaǵy mektep aǵymdaǵy jóndeýden ótedi. Qarqaraly kitaphanasy men alty aýyldyq klýb jóndeledi. Aýyldarda jańa sport jáne oıyn alańdary paıda bolady.
Aýdan turǵyndary úshin medıtsınalyq kómek te jaqsartylýda. Ótken jyly memlekettik-jekemenshik seriktestik boıynsha gemodıalız ortalyǵy ashyldy.
Endi sozylmaly búırek aýrýlary bar naýqastarǵa apta saıyn oblys ortalyǵyna barýdyń qajeti joq. Al bıylǵy jyly kompıýterlik tomografııa kabıneti bar klınıkalyq-dıagnostıkalyq zerthana ashý josparlanýda.