Qarqaralyda qandaı joldar jóndeldi
QARAǴANDY. QazAqparat - Qaraǵandy oblysynyń Qarqaraly aýdanynda bıyl 50,8 shaqyrym jol men eki kópir jóndeldi, jol boıyndaǵy sýaǵarlar jańartyldy. Bul maqsatqa 1 mlrd 327,12 mln teńge bólindi, dep habarlaıdy QazAqparat oblysy ákiminiń baspasóz qyzmetine silteme jasap.
«Jalpy somasy 490,9 mln teńgege respýblıkalyq mańyzy bar «Qaraǵandy-Aıagóz-Buǵaz» jolyna jóndeý jumystary júrgizildi. Oblystyq mańyzy bar joldardy jóndeýge 478,5 mln teńge bólindi. «Qaraǵandy-Aıagóz-Qoıandy-Egindibulaq-Búrkitti» tas jolyndaǵy Taldy ózenindegi jáne Baıqoja ózeni arqyly ótetin eki kópir qalpyna keltirilip, paıdalanýǵa berildi», - dep málim etti Qarqaraly aýdanynyń ákimi Halel Maqsutov.
Aýdan ákiminiń aıtýynsha, aýdandyq joldardy jóndeýge 363,7 mln teńge jumsalǵan. Bul qarjyǵa «Qarqaraly-Q.Amanjolov» jolyna, Qarqaralydaǵy T.Áýbákirov kóshesine jáne Qaraǵaıly aýylynyń úsh kóshesine ortasha jóndeý jumystary júrgizilgen. Aýdandyq mańyzy bar joldardaǵy 8 sýaǵar qalpyna keltirilgen.
Aıta keterligi, aýýdan boıynsha avtokólik joldarynyń jalpy uzyndyǵy 1 118 shaqyrym. Onyń ishinde 165 shaqyrymy - respýblıkalyq, 311- oblystyq jáne 632,4 shaqyrymy - aýdandyq mańyzy bar joldar.
