Qarqaralyda 200-ge jýyq bulaqtyń kózi ashyldy
Ár kóktemde ótkizilip turatyn taǵylymdy sharaǵa aýyl aqsaqaldary, jastar jappaı qatysty. Mamandardyń aıtýynsha, Qarqaralydaǵy 112 myń gektar aýmaqty alyp jatqan ný ormanda ósimdiktiń 700-den astam túri ósedi eken jáne ań-qustyń 190 túri mekendeıdi. «Maqsatymyz - tabıǵattyń osy baılyǵyn saqtap qalý», - deıdi jergilikti jurt.
Sońǵy jyldary ıgi jumysqa erikti túrde qatysatyn belsendi jastardyń qatary artyp keledi. Bıyl da mektep oqýshylary bir kisideı ormanǵa bet túzep, qustyń uıasyn ornatty, qystan qalǵan kúl-qoqysty jınady.
Sonymen qatar, ormannyń sanıtary sanalatyn qumyrsqanyń ıleýin qorshaýǵa alyp, mańaıyn tazalady.
«Áz-Naýryzymyz keldi. Osyǵan baılanysty qazaqta kóptegen joralǵylar bar. Sonyń biri - bulaqtyń kózin ashý. Bulaqtan búkil tirshilik nár alady ǵoı. Úlkender keleshek jastarǵa úlgi bolý úshin osy dástúrdi jalǵastyryp kelemiz»,- dedi Qarqaraly qalasynyń turǵyny Tilek Sádýaqasov.
