Qarqaralyda 12 mln. teńge jymqyrǵan aýdandyq aýrýhananyń kassıri sottaldy
QARAǴANDY. QazAqparat - Qaraǵandy oblysynyń Qarqaraly qalasynda 12 mln. teńgeni jymqyrǵany úshin aýdandyq aýrýhananyń burynǵy kassıri sottaldy. Bul týraly Qaraǵandy oblystyq sotynyń baspasóz qyzmeti habarlady.
«Qarqaraly aýdandyq sotynda ortalyq aýdandyq aýrýhananyń burynǵy kassıri Gúlbaram Ábdınovaǵa qatysty úkim jarııalandy. Ol ózine senip tapsyrylǵan ózgeniń múlkin iri kólemde ıemdengeni nemese talan-tarajǵa salǵany, sondaı-aq jalǵan qujat jasap, bas paıdasyna jaratqany úshin aıypty dep tanyldy. Oǵan bas bostandyǵynan 7 jylǵa aıyrý, múlkin tárkileý, jazasyn jalpy rejımdegi túzeý kolonııasynda óteý jazasy taǵaıyndaldy jáne ol 3 jylǵa deıin memlekettik qyzmette materıaldyq-jaýapty qyzmetpen aınalysý quqyǵynan aıyryldy», - delingen habarlamada.
Degenmen sottalýshynyń qaraýynda kámeletke tolmaǵan balalary bar ekendigin eskerip, sot jazany 5 jylǵa keıinge qaldyrdy.
Sonymen birge, sottalýshydan memleket paıdasyna 12,1 mln. teńge somasyndaǵy keltirilgen zalal óndirilip alyndy.
Іs materıaldaryna sáıkes, G.Ábdınova materıaldyq jaýapty tulǵa bola otyryp, 2013 jylǵy aqpannan 2014 jylǵy shildege deıingi aralyqta aýrýhananyń 12,1 mln. teńge somasyndaǵy aqshalaı qarajattaryn ıemdenip, talan-tarajǵa salǵan. Sonymen birge ol jalǵan qujattar jasap, bas paıdasyna jaratqan.
«Úkim zańdy kúshine engenge deıin kepil retindegi bultartpaý sharasy burynǵysha qaldyryldy», - dep qosty oblystyq sottyń baspasóz qyzmeti.
