Qarqaraly taýynda adasyp ketken jas jubaılar tabyldy
QARAǴANDY. QazAqparat - Qaraǵandy oblysynda tabıǵat aıasyna demalysqa shyqqan jas jubaılar adasyp ketti, dep habarlaıdy QazAqparat tilshisi oblystyq tótenshe jaǵdaılar departamentine silteme jasap.
TJD málimdemesine qaraǵanda, keshe 22:53-te Qarqaraly ulttyq tabıǵı parkine qarasty taýda eki adamnyń adasyp ketkeni týraly habar kelip túsken. Demalys úıleriniń birinde demalyp jatqan jubaılar Shaıtankóldegi ekskýrsııadan qaıtarda jol qysqartý úshin súrleýden shyǵyp, orman aralap ketken. Bir jarym saǵattaı júrgen soń, baǵdardy taba almaıtynyna kóz jetkizgen olar «112» nómirine qońyraý shalǵan.
Qutqarýshylar toby adasqandarmen telefon arqyly baılanysa otyryp, olardyń qaı jerde turǵanyn shamamen anyqtaǵan. Qarańǵy túsip, kóz baılanǵandyqtan, izdestirý-qutqarý isteri qıyndap ketti. Soǵan qaramastan, bir saǵatqa sozylǵan amaldar nátıjesin berip, jas jubaılar tabyldy.
Erli-zaıyptylarǵa medıtsınalyq kómek qajet bolǵan joq. Qutqarýshylar jubaılardy demalys aımaǵyna jetkizip saldy.
Qaraǵandy oblystyq TJD ormanǵa shyǵarda qarapaıym qaýipsizdik erejelerin saqtaýǵa shaqyrady.
