Qarqaraly aýdanynyń Kývsk ormanshylyǵyndaǵy órt joıyldy
QARAǴANDY. QazAqparat – 24 maýsym kúni saǵat 21.00-degi jaǵdaı boıynsha Qaraǵandy oblysy Qarqaraly aýdanynyń aýmaǵyndaǵy Kývsk ormanshylyǵynda tutanǵan órt oshaqtary oqshaýlandy. Ashyq janý jáne aýmaqtarda shóptiń byqsýy joq, dep habarlaıdy QazAqparat tilshisi.
Saǵat 21.00-de Qaraǵandy oblysynyń TJD Qarqaraly aýdanyndaǵy tabıǵı órtti joıý týraly habarlady.
«24 maýsymda saǵat 21.00-degi jaǵdaı boıynsha Qarqaraly aýdanynyń aýmaǵyndaǵy Kývsk ormanshylyǵyndaǵy órt oshaqtary oqshaýlandy. Ashyq janý jáne aýmaqtarda shóptiń byqsýy tyıyldy. Orman tóseminiń byqsyǵan jerlerinde beketter qoıylyp, táýlik boıy kezekshilik uıymdastyryldy. 25.06-da oshaqtardy baqylaý jáne aralaý josparlanǵan», - dep habarlady vedomstvodan.
Tabıǵı órtti sóndirý jerústi jáne áýe tásilderimen júrgizildi.
Oqıǵa ornynda barlyǵy 233 adam jáne 45 birlik tehnıka jumys istedi: Qaraǵandy oblysy TJ departamentiniń, órtke qarsy erikti qurylymdardyń, jergilikti atqarýshy organdardyń, orman sharýashylyǵynyń, Qarqaraly memlekettik ulttyq tabıǵı parkiniń, polıtsııanyń, «Altaı Polımetalldar» JShS kúshteri men quraldary.
Sondaı-aq, TJM sýaǵar qurylǵylary bar 2 tikushaǵy iske qosyldy. Barlyǵy 70 sý shashý júzege asyryldy.
TJ joıý aımaǵynda jedel shtab jumysy uıymdastyryldy.
Órttiń jalpy aýdany shamamen 1089 gektardy quraıdy. Órtti sóndirý qıyn taýly-jartasty jerlermen, sý qoımalarynyń janynda bolmaýymen, qatty jáne aýyspaly jelmen kúrdelengen.
