Qarqaraly aýdanynda jańa taý shańǵysy jáne saýyqtyrý keshenderi iske qosylmaq
QARAǴANDY. QazAqparat – Qarqaraly aýdanynda taý shańǵysy jáne saýyqtyrý keshenderi men qonaq úıler salý josparlanýda. Óńirlik kommýnıkatsııalar qyzmeti alańynda ótken brıfıngte aýdan ákimi Eldar Dúısetaev týrızmdi damytý týraly aıtyp berdi, dep habarlaıdy QazAqparat tilshisi.
«Qarqaralyda týrızmdi damytý qajet. Áleýet zor, sondyqtan biz kásipkerlikti memlekettik qoldaý sharalaryn paıdalana otyryp, jańa baǵyttar boıynsha jumys isteýdi josparlap otyrmyz. Qarqaralynyń tarıhı ortalyǵy jańǵyrtylady. Týrızmdi damytý jobasy aıasynda ınfraqurylym, taý shańǵysy, saýyqtyrý keshenderi, qonaq úıler men meıramhanalar qurylysyn salýdy josparlap otyrmyz», – dep atap ótti Eldar Dúısetaev.
Búgingi kúni Qarqaraly aýmaǵynda jáne onyń mańynda 35 demalys úıi men qonaq úıler shoǵyrlanǵan, olarǵa jyl saıyn jalpy alǵanda úsh myńǵa jýyq týrıst keledi. Jańa týrıstik keshender men qonaq úıler salýdan basqa, dambada qalalyq jaǵajaı uıymdastyrý josparlanýda.
«Jasyl Qazaqstan» jobasy aıasynda aýdan boıynsha alty myń túp kóshet otyrǵyzyldy. Bıyl da naqty jumystar josparlanǵan. Sonymen birge biz aımaqty sapaly sýmen, jaqsy joldarmen qamtymaı, týrızmdi damytý paıdasyz ekenin túsinemiz. Sondyqtan jaqyn arada aýyz sýmen qamtamasyz etý boıynsha «Jarly-Qarqaraly toptyq sý toraby» jobasy boıynsha qurylys jumystary bastalady. Sondaı-aq, «QazAvtoJol» kompanııasy Respýblıkalyq mańyzy bar Qaraǵandy-Aıagóz-Buǵaz avtojolyn jóndeýge JSQ daıyndaıdy. Eger qujat bıyl daıyndalsa, jóndeýge qarajat bólý máselesi sheshiletin bolady», - dedi spıker.
Sonymen qatar, aldaǵy jyldary aýdan ortalyǵynda jańa stadıon, basseın salý, kósheler men aýlalardy jaryqtandyrý jáne abattandyrý josparlanýda.
