Qarqaraly aýdanynda eldi mekenderdi sý basý qaýpi joıyldy - Qaraǵandy oblysy
ASTANA. QazAqparat - Sý basý qaýpi oryn alǵan Qarqaraly aýdanynyń eldi mekenderinde jáne Shet aýdanynyń Aǵadyr aýylyndaǵy jaǵdaı turaqtaldy. Bul týraly oqıǵa ornynda bolǵan oblys ákiminiń orynbasary Andreı Lıapýnov málim etti. Oblys ákimdiginde jýrnalısterge arnalǵan skaıp-brıfıng uıymdastyryldy.
«Aǵadyrda jaǵdaı turaqtaldy. Jedel áreket ettik. Qarqaraly aýdanynda jańbyr saldarynan erigen qar sýy mol bolyp, eldi mekenderdi sý basý qaýpi týyndady. Jarly aýylynda 9 úı sý astynda qaldy. Keshe aýyldy qorshaý boıynsha sharalar qolǵa alyndy. Sý qaıtty. Qazir úılerde sý joq. Adamdar óz úılerine oralýda, bılikke shaǵymdary joq», - dedi Andreı Lıapýnov.
Sonymen qatar, respýblıkalyq jáne oblystyq joldardaǵy sý jaıyldy.
«Jaǵdaı tolyq baqylaýǵa alyndy», - dep atap ótti oblys ákiminiń orynbasary.
Onyń aıtýynsha, áli de qaýip-qater bar. Óńirde sáýirdiń 3-9 aralyǵynda sý tasqyny bolady dep kútilýde. «Bul eki kún jaýǵan jaýynnyń jáne kúnniń jylynýynyń saldary. Taýlarda qar az qaldy, biraq qýystarda kóp. Ózender áli ashylǵan joq», - dedi Andreı Lıapýnov.
Oblysta ǵaryshtyq monıtorıng júrgiziledi. TJ qyzmeti táýligine eki ret ǵaryshtan sýretter alyp turady.
«Ǵaryshtyq sýretter boıynsha qar negizinen Qarqaraly aýdanynda jatyr. Ońtústik aımaqtarda, atap aıtqanda, Balqashta, Prıozerskide, Ulytaý aýdanynda qardyń 30 paıyzǵa jýyǵy jatyr. Sońǵy eki kúnde jaýǵan jańbyr qardyń molynan erýine ákep soqty», - dedi Qaraǵandy oblysynyń TJD basshysy Ibragım Kúlshimbaev.
23 naýryzda Qarqaraly aýdanynda Jarly ózeninde uzyndyǵy 400 metrlik ýchaskede muz jarý jumystary júrgizildi. Aldaǵy kúnderi Buqar jyraý men Nura aýdandaryndaǵy ózenderde muz jarý jumystaryn júrgizý kózdelgen. «Muz jarý jumystaryna qarjy bólindi. 18 tonna kóleminde jarylǵysh zattar qory bar», - dep atap ótti TJD basshysy.
Qaraǵandy oblysynda sý basý qaýpi bar 172 eldi meken ornalasqan, olarda 28 myń adam turyp jatyr. «Árbir eldi meken boıynsha halyqtyń mobıldi bóligi anyqtaldy - bul júktiler, balalar men óz betinshe qozǵala almaıtyn adamdar. Bul otbasylar esepke alyndy», - dedi Andreı Lıapýnov.
Oblys ákiminiń orynbasary Qarqaraly aýdanynan oralǵan soń sý basý qaýpi bar aımaqtardy aralaıdy. Aldaǵy úsh kúnde ol Shet, Osakarov jáne Nura aýdandaryna at basyn tiremek.
