Qarqaralyda maraldar tabıǵı ortaǵa qaıta jiberildi

ASTANA. KAZINFORM — 2022-2032 jyldar aralyǵynda Qarqaraly memlekettik ulttyq tabıǵı parkiniń aýmaǵynda jartylaı erkindikte ustalatyn maraldardy qaıta jersindirý júzege asyrylyp jatyr, dep habarlaıdy Orman sharýashylyǵy jáne janýarlar dúnıesi komıteti.

Vedomstvo atap ótkendeı, jyldyq josparǵa sáıkes jartylaı erkindikte baǵyp-kútilgen maraldardy tabıǵı ortaǵa beıimdeý jumystary kezeń-kezeńimen júzege asyrylady. Osy jospar aıasynda jartylaı erkindikte júrgen 4 bas maral tolyqtaı erkindikke, ıaǵnı dala jaǵdaıyna jiberildi.

— Maraldar Kent ormanshylyǵynyń 103-oram, 4-telimine shyǵarylyp, olardyń tabıǵı ortaǵa beıimdelýi baqylaýǵa alyndy. Atalǵan is-shara jabaıy janýarlar sanyn saqtaý men olardyń tabıǵı mekenin qalpyna keltirý maqsatynda júrgizildi, — delingen habarlamada.

Osyǵan deıin Qarqaraly ulttyq parki men Naýyrzym qoryǵyna órtke qarsy tehnıka tabystalǵany belgili boldy.