Qarqaraly ulttyq tabıǵı parkiniń aýmaǵynan órt shyqty

ASTANA. KAZINFORM — Búgin Qaraǵandy oblysy Aınabulaq aýylynan 20 shaqyrym jerde ornalasqan Bahtın orman sharýashylyǵynyń aýmaǵy órtene bastady, dep habarlaıdy Orman sharýashylyǵy jáne janýarlar dúnıesi komıteti.

Komıtettiń málimetinshe, órt shamamen 40 gektar jerdi sharpyǵan.

— 2025 jylǵy 27 sáýir kúni saǵat 08:47–de Aınabulaq aýylynan 20 shaqyrym jerde ornalasqan Bahtın orman sharýashylyǵynyń aýmaǵynda orman órti anyqtaldy. Órt alańy aldyn ala 40 gektardy quraıdy. Órtti sóndirý jumystary 09:35–te bastaldy, — dep atap ótti vedomstvo.

Belgili bolǵandaı, orman aýmaǵynda jel soǵyp tur. Qazir onyń jyldamdyǵy 15 m/s deıin jetedi.

Qazir órtti sóndirýge memlekettik ulttyq tabıǵı parkiniń 30 qyzmetkeri, 5 órt sóndirý kóligi, onyń ishinde 2 ShOPK, «Qazavıaormanqorǵaý» qyzmetiniń 1 tikushaǵy, 3 desantshysy, TJD 31 qyzmetkeri, spýtnıktik baılanysy, 7 tehnıkasy,  Balqantaý, Bahtın jáne Qyrǵyz aýyldyq okrýgteriniń erikti órt sóndirý bólimshelerinen 15 adam, 3 tehnıka, sondaı-aq «Ermak» qondyrǵysy tartyldy.

— Jaǵdaıdy baǵalaý úshin «Qazavıaormanqorǵaý» mekemesiniń BO-105 tikushaǵy tartyldy. Órt sóndirý shtaby Qarqaraly qalasyndaǵy Qarqaraly MUTP órt sóndirý beketinde ornalastyryldy. Órtti sóndirý jumystarynyń jetekshisi bolyp MUTP dırektor orynbasary Almaz Jumashev taǵaıyndalyp, ol órt ornyna jetti. Órtti sóndirý jumystary jalǵasyp jatyr, — delingen habarlamada.

Buǵan deıin Qaraǵandyda órtke oranǵan úıden úsh bala qutqarylǵanyn jazǵanbyz.